El úmitin úkilegen elordamyzdyń jyldan-jylǵa keń qanat jaıýyna baılanysty oqýshylar sany da artyp keledi. Otandastarymyz óziniń ómiri men qyzmetin, balalarynyń bolashaǵyn Astana qalasymen baılanystyrǵysy keletini de zańdy. Osyǵan baılanysty tek bıylǵy jańa oqý jylynda ǵana Astana mektepterine baratyn oqýshylar sany 13 myń balaǵa artyp otyr. Máselen, ótken oqý jylynda elorda mektepterindegi balalar sany 130 myń bolsa, bıyl 143 myń oqýshy dáris alady dep kútilýde. 2011-2012 oqý jylynda Astana qalasynyń mektepterinde 70 myń oqýshy bolsa, bes jyldan astam ǵana ýaqytta bala sany eki eseden astam ósip otyr.
Kóshi-qon úrdisiniń kúrt artýyna baılanysty bıylǵy jyly elordanyń 27 mektebinde kúrdeli jaǵdaı qalyptasqan. Osy problemany sheshý maqsatynda qala ákimdigi bıylǵy jyly birqatar mektepterde japsarlas qurylys salý isin qolǵa alǵan balatyn. Jańa oqý jyly qarsańynda 5 mektepte 2600 oryndyq japsarlas salynǵan qurylys nysandary paıdalanýǵa berildi. Astana qalasynyń ákimi Áset Isekeshevtiń málimdeýinshe, aldaǵy ýaqytta bul máseleni túbegeıli sheshý maqsatynda qalamyzda 11 myń oqýshyǵa arnalǵan 10 jańa mektep ǵımaratynyń qurylysyn salý qolǵa alynǵan kórinedi. Jańa oqý jylynda qaladaǵy 46 mektep tolyqtaı robottytehnıka kabınetterimen jaraqtandyrylyp, 10 mektep pen 4 kolledjde IT-mamandaryn daıarlaıtyn akademııalyq júıe jumys isteı bastaıdy. Bul óz kezeginde halyqaralyq sertıfıkattar alatyn 300 bilikti IT-mamandaryn daıarlaýǵa múmkindik beredi.
Elimizde bala týý kórsetkishiniń artýyna jáne Astana qalasyna qonys aýdaratyndar tasqynynyń tolastamaýyna baılanysty elordadaǵy mektep jasyna deıingi mekemelerdegi oryn tapshylyǵy azaıatyn emes. Qazirgi tańda astanalyq búldirshinderdiń balalar baqshalarymen qamtamasyz etilýi 70 paıyzdy qurap otyr. Búginde elordada 264 mektep jasyna deıingi tárbıe mekemesi jumys isteıtin bolsa, onyń 116-sy jekemenshik balalar baqshasy. 2017 jyldyń basynda memlekettik balalar baqshasynan oryn alý kezegine 94646 búldirshin tirkelse, onyń 33240-y 3 jastan 6 jasqa deıingi balalar bolyp tabylady. Osyǵan qaramastan, Astana qalasy bilim berý basqarmasy basshysynyń mindetin atqarýshy Ánýar Janǵozınniń málimdeýinshe, elordalyq búldirshinderdiń balalar baqshalarymen qamtylýy 2019 jyly tolyq sheshiletin kórinedi. Onyń sebebi, dál qazirgi kúni jekemenshik balalar baqshasyn ashý kásipkerler úshin tabys kózine aınalyp otyrǵan jaıy bar.
Máselen, joǵaryda aıtylǵan 116 jekemenshik balalar baqshasynyń 96-sy memlekettik tapsyrys boıynsha jumys isteıdi. Iаǵnı, osy 96 jekemenshik balalar baqshasyna qabyldanǵan árbir búldirshin úshin memleket aı saıyn 23 myń teńge kóleminde qarjy aýdaryp otyrsa, ata-analar 20800 teńge tóleıdi. Osyǵan baılanysty sońǵy kezde memlekettik balalar baqshasyna qaraǵanda, jekemenshik balalar baqshasy kóptep ashylýda.
2020 jylǵa deıin Astana qalasynda balalar baqshasyna degen suranysty tolyq jabý maqsatynda qala ákimdigi keshendi sharalardy is júzine asyryp keledi. Tek ústimizdegi jyldyń ózinde bas qalamyzda 7200 oryndyq birneshe balalar baqshasynyń ǵımaraty salynyp paıdalanýǵa berilmek. Memleket-jekemenshik áriptestigi tártibimen taǵy 6 balalar baqshasy ǵımaratyn salý jumysy bastaldy. 2019 jyly paıdalanýǵa berilýge tıis bul ǵımarattarda 1680 astanalyq búldirshin mektepke deıingi tárbıe jumystarymen qamtylmaq.
Búgingi býyrqanǵan órkenıet básekesine qosylǵan bas qalamyzdyń óskeleń urpaqqa sapaly bilim, sanaly tárbıe berý maqsatynda atqaryp jatqan jumysy aýqymdy. Bul rette óskeleń zaman talabyna saı materıaldyq bazanyń atqarar mindeti de ólsheýsiz. Sondyqtan qalalyq ákimdik elordanyń mektep jáne mektep jasyna deıingi balalar mekemelerine degen suranysyn tolyq qanaǵattandyrý maqsatynda keshendi mindetterdi júzege asyra bermek.
Jylqybaı Jaǵyparuly,
"Egemen Qazaqstan"
Sýretti túsirgen Erlan Omar,
"Egemen Qazaqstan"
