– Balalarymyz úshin osyndaı konsert uıymdastyrǵan ákimdikke úlken rahmet. Osyndaı merekeler kóp bolsyn. Jeksenbi saıyn balalarymyzben, nemerelerimizben birge áserli konsertter tamashalap, rahatqa bólendik, – deıdi zeınetker Dámetken Ábdirahmanova.
Apta saıynǵy «Dýmandy Saryarqa» jeksenbilik konsertter aıasynda tanymal qazaqstandyq ártister Dosymjan Tańatarov, Marjan Arapbaeva, Gúlzıra Bókeıhan, Dos, aǵaıyndy Júgúnisovter trıosy, sondaı-aq, syqaqshy Qanat Áljapparov pen Qaırat Ádilgereı jáne taǵy basqalar óner kórsetýde. Merekelik sharalar Prıgorodnyı, Internasıonalnyı, Mıchýrın, Kúıgenjar, О́ndiris, Jeleznodorojnyı, Úrker, Kóktal jáne Promyshlennyı turǵyn alaptarynda ótkizildi. Konserttik baǵdarlama barlyq jastaǵy kórermenderge arnalǵan. Barshaǵa belgili oryndaýshylardan basqa konsertterge bı jáne mýzykalyq ujymdar, kóshe teatrlarynyń ártisteri, anımatorlar, boıshań qýyrshaqtar qatysady, ınteraktıvti oıyn-saýyq baǵdarlamalar uıymdastyrylady. Kórermenderdiń kózaıymyna aınalǵan «Dýmandy Saryarqa» konsertteriniń baǵdarlamasy osyndaı. Balalar ertegi keıipkerlerine qosylyp bı bıleıdi, án aıtady jáne túrli oıyndar oınaıdy.
– EKSPO-2017 halyqaralyq mamandandyrylǵan kórmesin ótkizý aıasynda qala ákimdigi kópshilik nazaryna aýqymdy mádenı-buqaralyq sharalar usyndy – halyqtyq serýen, mádenı-buqaralyq, otbasylyq demalys, festıvalder, kórmeler, teatrlandyrylǵan jáne sırk qoıylymdary jáne basqa sharalar ótkizildi. Qala mańyndaǵy eldi mekenderdiń turǵyndary da merekeden tys qalmaýy úshin ár demalys saıyn munda da belgili ártisterdiń qatysýymen konsertter uıymdastyramyz, – deıdi Astana qalasynyń mádenıet, muraǵattar jáne qujattama basqarmasynyń basshysy Bolat Majaǵulov.
Astanada EKSPO kórmesi sheńberinde belgilengen mádenı-buqaralyq sharalar legi 1 maýsymda otandyq jáne reseılik úzdik ártisterdiń qatysýymen ótken Open Air konsertimen ashylǵan edi. «Qazaq Eli» monýmentiniń aldyndaǵy ashyq alańda ótken sharaǵa 50 myńnan astam kórermen jınaldy. Budan basqa, Joǵary lıganyń sońǵy jyldardaǵy chempıondarynyń qatysýymen ótken KVN jazǵy kýbogy, Olımpıada chempıony Evgenıı Plıýshenkonyń álemdik týrnesi aıasynda uıymdastyrylǵan muz aıdynyndaǵy «Shelkýnchık» ǵajaıyp shoý-ertegisi, Astanadaǵy San-Remo ıtalııalyq mýzyka festıvali, «Astana Arqaý» dástúrli qazaq mýzykasynyń konsertteri jáne tanymal qazaqstandyq estrada oryndaýshylarynyń «MýzArt» tobynyń, «Dervıshı» tobynyń shyǵarmashylyq keshteri, Seken Turysbektiń, Altynbek Qorazbaevtyń, Roza Rymbaevanyń, Aıqyn Tólepbergenniń jáne basqa shyǵarmashylyq keshterdiń elorda jurtshylyǵy men qonaqtaryn tamasha áserge bólegenin erekshe atap aıtqan jón.
Demalys kúngi «Dýmandy Saryarqa» konsertteri 11 maýsymda bastaý alǵan bolatyn. Eki aıdan artyq ýaqyttyń ishinde 120-ǵa jýyq konsert ótkizildi.
Aıta keterlik jaıt, «Dýmandy Saryarqa» qorytyndy konserti Konstıtýsııa kúnine oraılastyrylyp, 30 tamyzda ótkiziledi.
27 tamyzda elorda turǵyndary men qonaqtary taǵy da bir aýqymdy sharany tamashalaıdy. Astanada alǵash ret qazirgi zamanǵy mýzyka oryndaýshylaryna músinsheler tabystaý saltanaty ótti. Birinshi jyl saıynǵy «Astana daýysy» halyqaralyq festıvalinde 15 memlekettiń jyldyń úzdik ánshileri baǵyn synady. Qazaqstannyń tórinde bir sahnada mýzyka ındýstrııasyna baǵyt beretin ártister – Grıgorıı Leps, Svetlana Loboda, Bıanka, Vıllı Ýılıams, Ilıas Iаlchıntash, Arash, DJ Sava, Eva Sımons jáne taǵy basqalar óner kórsetti. Festıvalǵa Qazaqstannyń atynan belgili ánshi Qaırat Nurtas qatysyp, án shyrqady. Aýqymdy konsert Beıbitshilik jáne kelisim saraıynda ótti.
Jylqybaı Jaǵyparuly
Egemen Qazaqstan
sýretti túsirgen Erlan Omar
Egemen Qazaqstan
