Kórmeni tanystyrý saltanatynda sóz sóılegen Roman Vasılenko qurmetti qonaqtarǵa Qazaqstannyń atom bombasynan qalaı bas tartqany jáne ıadrolyq synaq alańynyń jabylýy jóninde tarıhı maǵlumat berdi.
«Káripbek Kúıikovtiń týyndylary ıadrolyq qarýdyń zardaptary jóninde maǵlumat beredi. «Radıasııa» dep atalatyn kórme Qazaqstan halqynyń zulmat synaqty qalaı bastan ótkergenin jáne ıadrolyq qarýsyz álemge degen talpynysyn beıneleıdi», ‒ dedi Syrtqy ister mınıstriniń orynbasary Roman Vasılenko.
Kórmege kelgen qonaqtar da sýretshiniń ónerin joǵary baǵalady. Iаdrolyq qarý qurbany Káripbek Kúıikov óz kezeginde estelikterimen bólisip, «Semeı ‒ Nevada» qozǵalysy jóninde áńgimelep berdi.
«Salǵan sýretterim meniń ǵana ishimdegi janaıqaı emes, bul – atom bombasynyń zardabyn tartqan barsha adamzattyń álem elderine aıtqan nazy. Bizdiń maqsatymyz anyq: birlese otyryp ıadrolyq qarýǵa jáne ony qoldanýǵa túbegeıli qarsymyz», ‒ dedi Káripbek Kúıikov.
Sýretshiniń jalyndy sózderi kórmege jınalǵandardy beıjaı qaldyrǵan joq. K.Kúıikov ótken ómiriniń qıyndyǵyn aıtyp jatqanda qasymyzda turǵan qonaqtardyń birazy kózderine jas alǵanyn baıqap qaldyq. Osydan-aq, konferensııanyń qurmetti meımandarynyń óz isine shynaıy berilgeni aıtpasa da túsinikti.
Káripbek Kúıikov ‒ ıadrolyq qarýdyń zardabyn tartqan jandardyń biri. Sýretshi Semeı synaq polıgonyna jaqyn ornalasqan Egindibulaq aýylynda týǵan. 40 jyl júrgizilgen ıadrolyq synaqtyń izderi Káripbektiń densaýlyǵyna óz áserin tıgizdi. Dúnıe esigin ashqanda qos qoly da bolmaǵan sýretshiniń jigerin taǵdyr taýqymeti jasyta alǵan joq. Ol jastaıynan qylqalamdy aýzymen tistep ne aıaqtarynyń bashpaıymen qysyp sýret salýǵa mashyqtandy.
Surapyl synaqtyń zardabyn tartqan azamat búginde antııadrolyq qozǵalystyń belsendi múshesi hám «ATOM» jobasynyń qurmetti elshisi mindetin atqarady. 2012 jyly Qazaqstan Prezıdenti Nursultan Nazarbaevtyń bastamasymen iske qosylǵan «ATOM» jobasynyń maqsaty ‒ ıadrolyq qarýdyń zııanyn álemge nasıhattaý. Búginde joba saıtynda jarııalanǵan atom bombasyna qarsy onlaın petısııaǵa jer jahannyń júzden asa elinen 300 myńǵa jýyq adam qol qoıǵan.
Sýretshiniń týyndylarymen búginde álem jaqsy tanys. Elbasy Nursultan Nazarbaev Vashıngtonda ótken ıadrolyq qarýsyzdaný sammıtinde burynǵy AQSh prezıdenti Barak Obamaǵa Káripbek Kúıikovtiń salǵan sýretin syıǵa tartty.
Abaı Asankeldiuly,
«Egemen Qazaqstan»
