Bir aptaǵa sozylǵan alaman saıysqa 11 eldiń 150-den astam kókparshylary baq synasyp, alańda aıanbaı aıqasty. Jarystyń alǵashqy kúni bes kezdesý ótip: Tájikstan, Túrkııa, Qazaqstan, Qytaı, Qyrǵyzstan komandalary qarsylastaryn tize búktirse, jarystyń ekinshi kúni – 22 tamyzda: Mońǵolııa – AQSh (10:4), Tájikstan – Túrkııa (12:2), Qyrǵyzstan – О́zbekstan (11:2), Aýǵanstan – Majarstan (12:2), Qytaı – Reseı (5:0) esebimen jarysty qorytyndylady.
Jarystyń úshinshi kúni – 23 tamyzda, Mońǵolııa men О́zbekstan, Túrkııa men Qyrǵyzstan, Qazaqstan men Reseı, AQSh pen Tájikstan jáne Majarstan men Qytaı komandalary arasynda ózara kezdesý ótti. Qorytyndy esep tómendegideı: Mońǵolııa – О́zbekstan (8:4), Qyrǵyzstan – Túrkııa (13:3), Qazaqstan – Reseı (15:3), Tájikstan – AQSh (9:2), Qytaı – Majarstan (8:2).
Al jarystyń tórtinshi kúni – 24 tamyzda ótken bes oıynnyń alǵashqysy Túrkııa men Mońǵolııa komandalary arasynda ótip, tartysqa toly bul báseke kórermendi bir serpiltip tastady. Alpaslan Jeılan bastap kelgen Anadoly azamattarynyń turaǵy Túrkııa demeseńiz deni etıkalyq qyrǵyzdar. Olar Mońǵolııanyń atynan kelgen baı-ólkelik baýyrlarmen jan berip, jan alysty. Nátıjesinde Rom Áýeshan bastap kelgen Baı-ólke kókparshylary Aıbarys Bolat, Dosan Esjan, Qýantaı Qaıyrjandar qos-qostan salym alyp (10:7) jeńiske jetti. Kelesi oıyndardyń esebi: О́zbekstan – AQSh (11:1), Qyrǵyzstan – Tájikstan (15:2), Aýǵanstan – Reseı (5:1), Qazaqstan – Qytaı (14:5).
Saıystyń besinshi kúni – 25 tamyzda chempıonattyń irikteý oıyndary bastaldy. «B» tobynan Qazaqstan, «A» tobynan Qyrǵyzstan komandalary úzdik shyǵyp, bas júlde úshin saıysýǵa múmkindik alsa, «B» tobynan jartylaı fınaldyq saıys úshin Mońǵolııa men Tájikstan komandalary aıqasyp, nátıjesinde 10: 9 esebimen tájik jigitteri basym tústi. Ekinshi toptan Aýǵanstan men Qytaı komandalary ózara jeńimpazdy anyqtady. Munda 4:2 esebimen Ermek Toqtarbek bastap kelgen qytaılyq qandastarmyz jeńiske jetti. Sóıtip, jartylaı fınal, ıaǵnı qola júlde úshin tartys Qytaı men Tájikstan komandalary arasynda ótetin boldy.
Keshe saǵat 16.00-de qola júlde úshin tartys joǵarydaǵy eki komanda arasynda bastaldy. Oıynnyń alǵashqy kezeńinde qytaılyq qandasymyz Muhıt Qýanyshuly esep ashqanymen, ekinshi taımda oıyn tizginin qolǵa alǵan tájik kókparshylary Hodjıakbar Dostıev pen Rýzıkýl Karaevtar bir-bir salymmen ese qaıtaryp, tájik jigitteri jeńiske jetti. Olar 3-orynǵa taban tirep, júlde qoryna tigilgen 3 mln teńgege ıelik etti.
Al kezekti chempıonattyń bas júldesin sarapqa salǵan Qazaqstan men Qyrǵyzstan kókparshylary ǵasyrda bir bolatyndaı saıys ónerin kórsetti. Oıynnyń alǵashqy salymy qazaqstandyq shabandoz Temirhan Aıtbaevtyń enshisine buıyrsa, kóp keshikpeı kánigi qyran Baqtybaı Shyrynqulov esepti 2:0-ge jetkizdi. Birinshi kezeńniń 12-shi mınýtynda Abylaı Nyshanbek salymdy eselep, qonaqtardyń taý qulatar ekpinin saıabyrsytty. Dese de qyrǵyz kókparshylary qarap qalǵan joq, oıynnyń bitýine 2 mınýt qalǵanda Rýstam Tynalıev salym alyp, birinshi kezeń 3:1 esebimen aıaqtaldy.
Saıystyń ekinshi kezeńi qazaqstandyqtardyń berik qorǵanys shebin qurýymen este qaldy. Alma-kezek alapat tartys aıaqtalýǵa jaqyn qalǵan 16-shy mınýtta Mańǵystaý kókpar komandasynyń oıynshysy Aleksandr Pýpenko sońǵy salymdy saldy. Sóıtip, 4:1 esebimen jeńiske jetken Qazaqstan kókparshylary chempıonat kýbogymen qatar 10 mln teńge júlde qoryna qol jetkizse, 2-oryn ıesi Qyrǵyzstan komandasyna 5 mln teńge buıyrdy.
Qýanyshbek Quramaev, Qazaqstan kókpar qurama komandasynyń jattyqtyrýshy:
– Kókpar Ortalyq Azııada ómir súrip jatqan túrkitektes halyqtardyń bárine ortaq. Biraq chempıonattyń Qazaqstanda ótýi – eldegi turaqtylyq pen tynyshtyqtyń kepili. Buǵan deıin 2013 jyly kókpardan Azııa chempıonatyn uıymdastyrǵan bolatynbyz. Endi mine, álem chempıonatyn ótkizýge qol jetkizdik. Bizdiń jeńiske qol jetkizgenimiz úlken jattyǵýdyń nátıjesi dep oılaımyn.
Talas Begalıev, Qyrǵyzstan kókpar qurama komandasynyń jattyqtyrýshysy:
– Qyrǵyzstanda 50-den astam kókpar komandasy bar. Osylardan iriktep-suryptap komanda jasap ákeldik. Buǵan deıin de kelgenbiz. Fınalǵa deıin barlyq qarsylastarymyzdy qalpaqpen qaǵyp aldyq desek qateleseımiz. Buǵan deıin bizdiń jigitter jasandy serkemen kókpar tartyp kórmegendikten qıyn boldy. Kókpar oıynynyń óz esebi bar. Al sheńber jaǵdaıynda bul esep tipti basqasha. Sol sebepti azdaǵan jańylysýlar boldy. Komandalyq esepte ekinshi oryn aldyq. Osyǵan qanaǵat!
Beken Qaıratuly,
«Egemen Qazaqstan»
