Jekpe-jektiń birinshi raýndynan bastap F.Sháripova qarsylasyn buryshtan-buryshqa tyqsyryp, belsendiligin baıqatty. Al qarsylasy M.Koleva qorǵanysqa kóp kóńil bólip, sáti túskende ǵana qarsy shabýyldaýmen boldy. Raýnd saıyn qarqynyn arttyrǵan otandasymyz dóp soqqylarymen kózge tústi. Bolgar qyzy da bul keshke jaqsy daıyndyqpen kelgenin, tájirıbeli boksshy ekenin baıqatty. Jerlesimiz 10 raýnd boıy soqqynyń astyna alǵanymen, qarsylasy jekpe-jektiń sońyna deıin nokaýtqa túsken joq. Tóreshiler jeńisti biraýyzdan otandasymyzǵa berdi.
Sóıtip, Fırýza Sháripova jeńil salmaqta WIBA jáne WBU tujyrymdary boıynsha chempıondyq ataqqa qol jetkizdi. Sonymen qatar, ol áıelder arasynda kásipqoı bokstan Qazaqstannan shyqqan tuńǵysh álem chempıony atandy. Jekpe-jekten keıin jerlesimiz qoldaýǵa kelgen jankúıerlerge alǵysyn bildirdi. «Meni qoldaýǵa kelgen barshalaryńyzǵa alǵysym sheksiz. Jattyqtyrýshylarym men ata-anama rahmetimdi aıtamyn. Bul jeńiske úlken eńbektiń arqasynda qol jetkizdik. Komandama rahmet. Alǵa, Qazaqstan», – dedi boksshy qyz.
Sháripova-Koleva boks keshiniń anderkartynda birneshe qazaq boksshysy ózderiniń kezekti kezdesýlerin ótkizdi. Ekinshi orta salmaqtaǵy Aıdyn Eljanov (4-0, 3 KO) debıýttik kezdesýin ótkizgen otandasymyz Abylaıhan Esentaevty (0-1) ekinshi raýndta tehnıkalyq nokaýtpen utty. Al orta salmaqtaǵy boksshymyz Tamırlan Raıymqulov (1-0-1, 0 KO) ózbekstandyq qarsylasy Stepan Partnovtan (0-1) basym tústi. Sonymen qatar, jartylaı orta salmaqtaǵy Ámirhan Túleýov (2-2-0) reseılik qarsylasy Andreı Kremenosovty esh qıyndyqsyz jeńdi. A.Kremenosov birinshi raýndtan keıin jekpe-jekti jalǵastyrýdan bas tartty.
Álı BITО́RE,
«Egemen Qazaqstan»
