Qyzyljardyń topyraǵy qunarly. Ortasha bonıtet 55 baldy quraıdy. Astyq ósirýge taptyrmaıtyn qutty ólke. Búginge deıin bıdaı daqylyna basymdyq berilip kelse, Elbasynyń astyq óndirisin ártaraptandyrý tapsyrmasyna baılanysty keshendi sharalar júzege asyryla bastady. Qazir maıly daqyldar alqaby 712 myń gektarǵa jetkizildi. Aldaǵy ýaqytta 1 mıllıon gektarǵa deıin ulǵaıtylmaq. Aýyl sharýashylyǵy salasyn keńinen damytýdyń yqtımaldy joldary san taraý. Onyń ishinde uqsatý isin jolǵa qoıýdyń, qaltaly qarjygerlerdiń kómegine súıenýdiń mańyzy zor. Elimizde sheteldik ınvestorlarǵa qoldaý aıryqsha. Sol sebepti bolar, Qytaı eliniń ınvestorlary oblysqa kelgen bir saparynda agroóndiristik park qurmaq oılaryn jetkizgen. Olardyń et, sút, taǵy basqa aýylsharýashylyq ónimderin tereńdetip óńdeý jónindegi ozyq jobalary aımaq basshysy Qumar Aqsaqalovtyń tarapynan qoldaý tapqan bolatyn. Jasyratyny joq, óńirde shıkizat qory mol, jetkilikti bolǵanymen, ettiń 20 paıyzy, unnyń 10 paıyzy, súttiń 50 paıyzy ǵana tereńdetilip óńdeledi. Irgetasy Taıynsha aýdanynda qalanady dep belgilengen bolashaq zaýyttyń quryltaıshysy Dzıa Heıdiń «biz Qazaqstannyń sapasy joǵary, ekologııalyq taza ónimderin birlesip paıdalaný úshin tyǵyz áriptestik qarym-qatynas ornatýǵa múddelimiz. Sizderdegi «Nurly jol», bizderdegi «Bir beldeý – bir jol» baǵdarlamalary bir-birimen tyǵyz sabaqtas. Maqsatymyz – logıstıkalyq tizbek qurý», degen edi. «Aıszıý» sekildi álemdik naryqta tanymal kompanııanyń quramyna 1400-deı enshiles azyq-túlik kásiporny enetinin eskersek, ınvestorlardyń múmkindikteri qandaı dárejede ekenin shamalaı berýge bolady. Qaı-qaısysy bolsyn IT-tehnologııalarmen jumys isteıdi.
«Taıynsha-Maı» JShS-niń dırektory Sáken Muhamadıev BAQ ókilderine bergen suhbatynda shıkizat óndirýshilermen, kooperatıvtermen birlesip jumys isteıtinderin, basty maqsat eksportqa baǵdarlanǵanyn jetkizdi. Keleshekte ártúrli salalardaǵy ınvestorlardy tartý arqyly kespe, et-sút ónimderin qaldyqsyz óńdeý qolǵa alynatyn bolady. Qytaıǵa jóneltiletin ónimniń sapasy men ekologııalyq tazalyǵyna erekshe nazar aýdarylǵan. Jańa seh tolyq avtomattandyrylyp, kúnine 400 tonna tazartylǵan ósimdik maıyn shyǵarady. 70 adam turaqty jumyspen qamtylǵan.
– Maıly daqyldardyń rentabeldiligin kóterýdiń naqty sharalaryn úzbeı qarastyrýymyz qajet. Bul turǵydan alǵanda, elimizdegi shıkizat óńdeıtin jáne maı tazartatyn eń iri zaýyttyń múmkindikteri mol, – dedi tusaýkeser rásiminde sóılegen sózinde Qumar Irgebaıuly.
О́mir ESQALI,
«Egemen Qazaqstan»
Soltústik Qazaqstan oblysy
