Almaty oblysynyń ákimi jastarmen fýtbol oınady

I.Jansúgirov atyndaǵy Mádenıet saraıynda ótken jıyndy kóp­ten basy qosylmaǵan ardager sport­shylardyń keleli kezdesýi boldy deý­ge bolady. Elimizdiń búgingi spor­tyn, izbasarlarynyń aıaq alysyn, jetistikterin aıtysyp, aldaǵy kúnge boljam jasap, tileý tilesken kesh­tiń shymyldyǵy óńir sportynyń je­tis­tikterine arnalǵan shaǵyn beınerolıkpen túrildi. «Jetisý jetistikteri» ata­latyn shaǵyn derekti fılm sport­shy­lardyń kásibı merekesine jasalǵan bir syılyq deýge bolady. Onda sońǵy jyldary óńir sportshylary qol jetkiz­gen júldeler saralanyp, aımaq boıynsha sport salasyn damytý úshin atqarylyp jatqan ister men ashylyp jatqan nysandar jaıynan habardar bolýǵa bolady. Bul týrasynda jıyn­nyń saltanatty ashylýynan keıin sóz alǵan oblys basshysy da keńinen toq­tal­dy. Sóziniń basyn mereke ıelerin qut­­­tyq­taýdan bastaǵan ákim oblys boıynsha buqaralyq sportty damytýda­ kóp­ istiń qolǵa alynyp jatqanyn aıta kelip:

– Prezıdentimiz Nursultan Nazar­baev halyq densaýlyǵynyń kilti sanalatyn dene shynyqtyrý men sportqa memleket únemi qamqorlyq kórsetý qajettigin atap kórsetti. Elbasynyń sol tapsyrmasyn oryndaý maqsatynda Almaty oblysynda sport jáne dene shynyqtyrýdy damytý baǵytynda birqatar jumystar atqarylyp ke­le­di. Bıylǵy jyly jalpy osy sala­ǵa oblystyq bıýdjetten 6 mlrd teń­ge bóli­nip, sport mektepteriniń mate­rıal­dyq-tehnıkalyq bazasy nyǵaı­ty­lý­da. Jańa sport nysandary salynyp, sta­dıondar men sporttyq ǵımarattar jań­ǵyrtylyp jatyr. Sonyń arqasynda bizdiń jas sportshylarymyz bar kúsh-jigerin jumsap, túrli sporttyq jarys­tarda joǵary kórsetkishke qol jetkizip júr, – dedi. 

Sportqa jáne sportshylarǵa qoldaý bildirý boıynsha Almaty oblysynyń ákimdigi aldyńǵy qatarda atalatyny sózsiz. Máselen, jetisýlyq 72 talantty sportshyǵa jalpy somasy 76 mln teńge kóleminde stıpendııa taǵaıyndalǵan. Sportty tolyq qoldaý úshin aldymen ulttyq sport túrlerine nazar aýdar­maı bolmaıdy. Bul tarapta da jetistikter az emes. Júırik baptaýdyń ózi – úlken sport. О́tken jyly Astanada uıymdastyrylǵan «Altyn tulpar» báıgesinde Jetisý óńiriniń júırigi top jar­ǵanyn, tól ónerimiz qazaq kúresinen de olja salyp júrgen jigitterdi my­salǵa alyp, bul jaqsylyqtar aldaǵy kúni jalǵasa berýi úshin basshylyq tarapynan qoldaý jalǵasa beretinin sóz qyldy.

Sonymen qatar, aldaǵy ýaqytta úsh ny­san: Taldyqorǵan qalasynda olım­pıadalyq standartqa saı júzý basseıni, bıiktikten sýǵa sekirý jáne jabyq je­ńil atletıka maneji boı kóteretinin aıtty.

Rıo-de Janeıroda ótken jazǵy paralımpıadalyq oıyndarda kúmis medaldy jeńip alǵan, paýerlıftıngten halyqaralyq dárejedegi sport sheberi Raýshan Qoıshybaeva men Rıo olım­pıadasynyń kúmis júldegeri ziltemirshi Karına Gorıchevaǵa eki bólmeli páter kilti tabystaldy. Taıpeıde ótip jatqan sport dodasynda júrgen Karınaǵa bul syı­lyq jiger bereri sózsiz desip jatty jurt. Sonymen birge, Mádenıet jáne sport mınıstrliginiń «Qurmetti sport qyzmetkeri» tósbelgisimen oblystyq jo­ǵary sport sheberligi mektebiniń er­kin kúres jattyqtyrýshysy Aman Buǵybaev, dzıý-do kúresinen jat­tyqtyrýshy Tımýr Abyhanov mara­pattaldy. «Dene shynyqtyrý jáne sportty damytýǵa sińirgen eńbegi úshin» tósbelgisi Jambyl aýdany balalar men jas­óspirimder mektebiniń dırektory Baq­bergen Qaıyr­lybaev pen Qarasaı aýda­ny balalar jáne jasóspirimder sport mektebiniń dırektory Valerı Ha­sıevke taǵyldy. Odan bólek birneshe sport ardagerleri men mamandarǵa mı­nıstr­diń, oblys ákiminiń atynan qurmet gramotalary men alǵys hattar tabystaldy.

Jıyn sońynda Qazaqstannyń eńbek sińirgen jattyqtyrýshysy, sport qaı­­ratkeri Ákeshaı Jaılaýbekov sóz sóı­lep, sportqa únemi qoldaý bildirip otyr­ǵan oblys basshysyna barlyq sport mamandary men sportshylardyń aty­nan alǵys aıtty. Kesh sońy mereke­lik konsertpen jalǵasty.
Sport merekesin atap ótý budan ári «Jetisý» stadıonynda jalǵasty. Oblystyq «Jetisý» fýtbol klýbynyń negizgi quram oıynshylary men jas­ós­pirim tárbıelenýshileri arasynda jol­dastyq kezdesý ótti. Bul oıynnyń ereksheligi – oblys ákimi Amandyq Bata­lovtyń jasóspirimder komandasy qu­ramynda dop tepkeni. Oıyn aldynda klýbtyń kúrdeli jóndeýden ótken jataqhanasyna bas suǵyp, jumys sapasyn teksergen ákim kezdesý bastalardan buryn sportshylardy quttyqtap, jas oıynshylarǵa tilek aıtty: «Álem boıynsha mıllıondaǵan adam­dardyń súıikti oıyny sanalatyn fýt­bolmen oblysymyzda 111 myń adam­nyń aınalysatyny qýantady. Solar­dyń ishinde ózderińiz sııaqty jas sport­shylar da bar. Aralaryńyzdan bola­shaqta joǵary sanatty kásibı fýt­bol­shylardyń shyǵa­tynyna senimdimin».

Sondaı-aq, óńir basshysy ózimen bir komandada dop teýip, 4:1 esebimen jeńiske jetken jasóspirimderge 200 dop syıǵa tartty. 

Almas NÚSIP,
«Egemen Qazaqstan» 

Almaty oblysy