Baspasóz máslıhatynda Bas prokýratýranyń Quqyq qorǵaý qyzmetteri ortalyǵynyń basshysy Saǵatbek Súleımen jumys barysy jóninde baıandap, Ortalyqtyń qurylýy Ult josparynyń 100-shi qadamy, ıaǵnı quqyq qorǵaý qyzmetterin bir jerge shoǵyrlandyrýdan bastaý alatynyn atap ótti.
«Elbasy barlyq memlekettik organdarǵa adamdardy kabınet aralatpaı, olardyń kez kelgen talap-tilekteri sheshimin tabýy tıis dep tapsyrma berdi. Jyl saıyn prokýrorlardyń jeke qabyldaýyna 50 myńǵa jýyq adam júginedi. Osyny eskerip, azamattardy qabyldaý rásimin barynsha yńǵaıly etý maqsatynda bıyl shilde aıynda Quqyq qorǵaý qyzmetteri ortalyǵyn ashtyq», dedi Saǵatbek Súleımen.
Baspasóz máslıhaty barysynda Ortalyq usynatyn qyzmet túrleri de keńinen baıandaldy. Ortalyq basshysynyń aıtýynsha, prokýrorlar azamattardy qabyldaý barysynda naqty isterdi suratý, tómen turǵan prokýrorlardyń prosessýaldyq sheshimderiniń zańdylyǵyn tekserý, sonymen qatar ótinishti «Elektrondy úkimet» portaly arqyly quzyrly organdarǵa joldaý múmkindigine ıe.
Sharaǵa Respýblıkalyq advokattar alqasy tóraǵasynyń orynbasary Qadyrjan Baımuhanova, «Qazaqstan medıatorlar qaýymdastyǵy» ZTB-nyń bas dırektory Jandildá Jaqypov jáne «Pravo» QQ-nyń tóraıymy Olga Ryl qatysty. Spıkerler Ortalyq jumysyna qatysty pikirlerimen bólisip, keleli máselelerdi talqylady.
Ortalyq keltirgen derekterge súıensek, bir aı ishinde 608 azamat prokýrorlardyń jeke qabyldaýynda bolyp, 342 adamǵa quqyqtyq kómek kórsetilipti. Sondaı-aq, 266 aryz qabyldanyp, óńirlerge tapsyrmalar berilgen. Al Ortalyq psıhologi 97 kelýshige konsýltatıvtik kómek kórsetti. 47 kelýshige ESQ berilip, sol arqyly 33 elektrondy jáne 68 beıneótinishter jiberilipti. Sonymen qatar, advokattar 100 azamatqa tegin kómek kórsetken eken.
Esterińizge sala keteıik, 21 shildede Astanada Bas prokýratýranyń ǵımaratynda Quqyq qorǵaý qyzmetteri ortalyǵy ashylǵan-tuǵyn. Mekemeniń negizgi maqsaty – ótinishterdi jedel túrde sheshý, halyqtyń quqyq qorǵaý jáne memlekettik organdarǵa degen senimin arttyrý, sonymen qatar ákimshilik kedergiler men bıýrokratııany joıý. Mundaı ortalyq búginde Aqtóbe jáne Qyzylorda oblystarynda da ashyldy. Jyl sońyna deıin elimizdiń búkil óńirlerinde Quqyq qorǵaý qyzmetteri ortalyqtaryn ashý josparlanyp otyr.
Abaı ASANKELDIULY,
«Egemen Qazaqstan»
