Ońtústik adam resýrsyna baı bolǵandyqtan balabaqsha kezeginde elý myńǵa deıin búldirshin bar edi. Elektrondy júıeniń artyqshylyǵy – tóbesimen kók tiregen dáýdiń balasy bolsa da kezekten attap óte almaıdy. Ár ata-ana tolyq aqparattandyrylǵan júıeden bárin kórip otyrady.
Jıynǵa Bilim jáne ǵylym mınıstrliginiń ókili, oblystyq máslıhat depýtattary men basqarma basshylary, aýdan, qala ákimderi, jalpy bilim salasyna qatysty qurylymdardyń jetekshileri, barlyǵy 800-den astam adam qatysqan.
Oblystyq bilim basqarmasynyń basshysy Isataı Saǵyndyqov saladaǵy jetistikter men alda atqarylatyn jumystar ja-ıyn baıandady.
Atap aıtqanda, bıyl bilim salasyn qarjylandyrýǵa oblystyq bıýdjetten 257,6 mlrd teńge bólinip, ótken jylmen salystyrǵanda 19 mlrd teńgege artyp otyr. Munan bólek, osy jyly 31,2 mlrd teńgege 79 bilim nysanynyń qurylysy júrgizilip jatsa, onyń ishinde 29-y jyl sońyna deıin aıaqtalyp, paıdalanýǵa berilmek.
2016 jyly apatty jáne úsh aýysymdy 43 mektep bolǵan edi. Aǵymdaǵy jyly 20 mektep paıdalanýǵa tapsyrylady. Al qalǵan 23 mekteptiń qurylysyn 2018-2019 jyldary aıaqtaý josparlanǵan. Mektepke deıingi tárbıe men bilim berý mekemeleri ótken oqý jylymen salystyrǵanda 95 birlikke artyp, balabaqshaǵa kezekke turǵan 3-6 jastaǵy balalar sany 43 myńnan 28 myńǵa azaıdy.
Memlekettik baǵdarlamaǵa sáıkes mektep oqýshylary tegin oqýlyqtarmen qamtamasyz etilýde. Oblys boıynsha osy oqýlyqtarǵa jalpy 4,5 mlrd teńge bólinip, ótken jylmen salystyrǵanda 1,8 mlrd teńgege ósti.
Jıyn barysynda sóz alǵan oblys basshysy óńir pedagogtaryn jańa oqý jylymen quttyqtady.
Elbasy Nursultan Nazarbaev «Tabysty bolýdyń eń irgeli, bas-ty faktory bilim ekenin árkim tereń túsinýi kerek. Jastarymyz basymdyq beretin mejelerdiń qatarynda bilim árdaıym birinshi orynda turýy shart. Sebebi, qundylyqtar júıesinde bilimdi bárinen bıik qoıatyn ult qana tabysqa jetedi», degen bolatyn. Sondyqtan da búgingi tańda bilim berý mazmunyna, oqýshy men pedagog tulǵasyna jáne qyzmetine degen kózqarastar túbegeıli ózgeriske bet buryp otyrǵan kúrdeli kezeń, dedi óńir basshysy.
Oblys ákimi saladaǵy kemshin túsip jatqan máselelerge de toqtaldy. Kúrdeli máselelerdi sheshýdiń jaıttaryn tarazylady. Bul kún keıbir ustazdar úshin qonys toıyna ulasty.
Tamyz konferensııasynda bilim salasynda talaı jyldardan beri úlgili qyzmet etip kele jatqan óńirdegi úsh ustazǵa, atap aıtqanda, Shymkent qalasynyń M.Jumabaev atyndaǵy №39 jalpy orta mektebiniń bastaýysh synyp muǵalimi Aınur Dúısebekovaǵa, №66 Qazyǵurt jalpy orta mektebiniń ınformatıka pániniń muǵalimi Janat Musaevaǵa jáne Túrkistan qalasyndaǵy №9 Nekrasov atyndaǵy gımnazııasynyń qazaq tili páni muǵalimi Venera Batyrqulovaǵa páter kilti tabystaldy. Sonymen qatar, Bilim jáne ǵylym mınıstrliginiń nagradalary aıasynda 5 muǵalim «Y.Altynsarın», 5 ustaz «Bilim berý isiniń qurmetti qyzmetkeri» tósbelgilerimen marapattaldy.
Búginde óńirde orta mektepte 69 myńnan asa muǵalim bilim beredi. Bıylǵy oqý jylynda 640 myńǵa jýyq oqýshy mektep tabaldyryǵyn attaıdy dep kútilýde.
Baqtııar TAIJAN,
«Egemen Qazaqstan»
Ońtústik Qazaqstan oblysy
