Endi sanaýly kúnderden keıin jańa oqý jyly bastalady. Qyrkúıek kelip, kúz túskende oqýshylar asqaq armanmen, úkili úmitpen bilim alý maqsatynda altyn uıaǵa betteıdi. Bul kúnde ata-analar jańa oqý jylyna jappaı qam jasap, balalarynyń kerek-jaraqtaryn túgendeý ústinde ekeni belgili. Rasynda da álemdik bilim básekesindegi qabilettilik búgingi búldirshinderden bastaý alady. Al balǵyndar der kezinde laıyqty bilim alyp, baǵytyn aıqyndap alsa, baǵyndyrar bıik te alys emes.
Jańa oqý jyly jaqyndaǵan saıyn ata-analardyń da, ustazdardyń da jaýapkershiligi kúsheıe túsetini anyq. Bul jergilikti bıliktiń de nazarynan tys qalmaıtyn másele. Degenmen, jambyldyqtar jańa oqý jylyna daıyn ba degen másele tóńireginde óńirdegi bilim oshaqtarynyń búgingi jaı-kúıin sholyp shyqtyq. Ásirese, apatty jáne úsh aýysymdy mektepterdiń jaıy tolǵandyrarlyq.
Bul kúnde oblysta bilim berý júıesin damytýǵa kóp kóńil bólinip otyrǵany jıi aıtylyp keledi. Bıyl oblystaǵy bilim mekemelerin qarjylandyrýǵa 97,9 mıllıard teńge bólingen. Sondaı-aq, oqýshylardy oqýlyqpen qamtamasyz etý maqsatynda 1 mıllıard 870 mıllıon 23 myń teńge qarastyrylǵan. Munyń bári de memlekettiń balalar bolashaǵyna jasap otyrǵan qamqorlyǵy ekeni daýsyz. Sondyqtan da bilim básekesinde baǵytymyz aıqyn ekenine kóz jetkizýge bolady.
Apatty mektepter úshin alańdaýǵa negiz bar
Elbasy áýeli apatty mektepterdi qalpyna keltirýdi jáne úsh aýysymda oqytýdy joıýdy tapsyrǵany belgili. Ári bul jaǵdaı búginde ata-analardyń da alańdaýshylyǵyn týdyryp otyr. Sondyqtan da óńirlerde apatty mektepterden arylýdyń jan-jaqty joly qarastyrylyp, kóptegen apatty mektepter qalpyna keltirilýde. Jalpy, Jambyl oblysynda jyl basynda 9 mektep apatty jaǵdaıda dep tirkelgen. Oblystyq bilim basqarmasynyń málimetinshe, 4 mektep aǵymdaǵy jyly jańa qurylys esebinen paıdalanýǵa berilse, 3 mekteptiń máselesi kelesi jyly sheshiledi. Al qalǵan 2 mekteptiń máselesi 2018-2019 jyldary kezeń-kezeńimen sheshiledi dep josparlanýda. Iаǵnı, Jambyl oblysynda apatty jaǵdaıdaǵy mektepterdiń máselesin 2019 jyly sheshýge tolyq múmkindik bar. Sonymen qatar, úsh aýysymdy mektepterdiń de jaıy tolǵantarlyq. «Úsh aýysymdy mektepterdiń máselesi de basty nazarda. Jańa oqý jylynda úsh aýysymdy 1 mektep «Nurly jol» baǵdarlamasy aıasynda Ulttyq qor esebinen paıdalanýǵa beriledi. Al 3 mekteptiń qurylysy aǵymdaǵy jyly Ulttyq qor esebinen bastalyp, 2018 jyly aıaqtalady. Qalǵan 1 mekteptiń jobalaý-smetalyq qujattary daıyndalyp, memlekettik saraptamaǵa ótkizildi. Sondaı-aq, mektepke deıingi tárbıemen qamtylǵan balalar úlesin arttyrý maqsatynda naqty jumystar atqarylýda», deıdi oblystyq bilim basqarmasynyń basshysy Rahııa Turmahanbetova.
Qurylys qanat jaıyp keledi
Áýlıeata óńirinde mektepterdiń qurylysy qarqyndy qanat jaıyp keledi. Al úsh aýysymdy mekteptiń azaby ata-analarǵa da ońaı emes ekeni belgili.
Jalpy, oblysta úsh aýysymmen oqytatyn 5 mektep bar. Merki aýdany Q.Sarymoldaev aýylyndaǵy 600 oryndyq jańa mekteptiń qurylysy merziminen buryn aıaqtalyp otyr. Aıta keteıik, 600 oryndyq mekteptiń qurylysyna respýblıkalyq bıýdjetten 1 mıllıard 179 mıllıon teńge bólingen bolatyn. Nátıjesinde jańa oqý jylynan bastap merkilik jetkinshekter zaman talabyna saı bilim oshaǵynda oqıtyn bolady. Sonymen qatar, Taraz qalasy №24 orta mekteptiń 300 oryndyq qosalqy ǵımaraty, Taraz qalasy Shóldala ıinindegi 900 oryndyq jáne Baızaq aýdany Baızaq aýylynda 300 oryndyq bilim oshaqtarynda qurylys jumystary qarqyn alyp tur. Atalǵan mektepter kelesi jyly paıdalanýǵa berilmek.
«Nurly jol» baǵdarlamasy sheńberinde salynyp jatqan Taraz qalasyndaǵy 1000 oryndyq orta mektep jáne jergilikti bıýdjet esebinen boı kótergen Sarysý aýdany, Dosbol aýylyndaǵy 50 oryndyq, sondaı-aq, Talas aýdany Qaraoı aýylyndaǵy 50 oryndyq orta bilim mekemeleri de jańa oqý jylyna daıyn. Munda da talaı jetkinshekter bilim alyp, egemen eldiń erteńi bolyp qalyptasatynyna senim mol.
Túıin
Aǵymdaǵy jyly Jambyl oblysynda 22 bilim nysanyna kúrdeli jóndeý jumystary júrgizilse, osy maqsatta oblystyq bıýdjetten 3158,214 myń teńge qarajat bólingen. Sonymen qatar, 135 bilim nysanynyń da aǵymdaǵy jóndeýden ótkizilgenin aıta ketý kerek. Oǵan 125 mıllıon 527 myń teńge kóleminde qarjy qarastyrylǵan eken.
Elbasy únemi bilim básekesindegi qabilettilik týraly aıtyp keledi. Bilimdi urpaqtyń ǵana baqyty mol, yrysy shalqar bolmaq. Al zaman talabyna saı mektepten bilim alyp shyqqan óren erteń-aq elge tutqa bolatyn azamatqa aınalady.
Hamıt ESAMAN,
«Egemen Qazaqstan»
Jambyl oblysy
