Qurmetti baýyrlar!
Barshamyzdy aıtqa aman-esen jetkizgen Alla taǵalaǵa sansyz shúkirler men maqtaýlar bolsyn!
Barshańyzdy kúlli musylman qaýymy asyǵa kútken qasıetti, ulyq mereke – Qurban aıt meıramymen quttyqtaımyn! Otbasylaryńyzǵa amandyq, myqty densaýlyq, jumystaryńyzǵa bereke tileımin.
Qurban aıt – Jaratýshy ıemiz belgilep bergen eki meıramnyń ulyǵy, aıtýly mereke. Halqymyz bul meıramǵa aıryqsha daıyndalyp, kópshilikpen erekshe atap ótedi. Berekege bastaǵan Qurban aıt birlik pen ıgilikke, meıirim men keshirimge úndeıdi.
Aıt – aǵaıynnyń aýyzbirshiligin arttyra túsetin, musylman qaýymyn ımandylyqqa uıytyp, barsha adamdy qanaǵat pen táýbege shaqyratyn ulyq meıram. Aıt kúni adamdar qurban shalýmen ǵana emes, saýapty, izgi, qaıyrly amaldarymen Rabbysynyń razylyǵyna, raqymyna jaqyndaı túsedi. О́ıtkeni, arab tilindegi «qurban» sózi «jaqyn bolý», «jaqyndaý» degen uǵymdardy bildiredi.
Qasıetti Quranda: «Umytpańdar, olardyń eti de, qany da eshqashan Allaǵa jetpeıdi. Oǵan jetetin nárse – júrekterińizge uıalaǵan taqýalyqtaryń (shynaıy nıetteriń)» («Haj» súresi, 37-aıat), – dep baıandalǵan.
Aıt kúnderi qajylyq paryzyn óteıtin kúlli musylman balasy Jaratýshyǵa jalbaryna duǵa jasap, qurbandyq shalady. Qasıetti Mekke qalasynda halqymyzdyń birligi men berekesin tilep jatqan otandastarymyzdyń da duǵasy, qajylyǵy qabyl bolǵaı!
Qarjylyq múmkindigi joq adamǵa qurban shalý – mindet emes. Qurbandyq eti aǵaıyn-týys, kórshi-qolań, turmysy tómen otbasylaryna, jetim men jesirlerge, múgedekter men naýqas jandarǵa taratylady.
Qurban aıt kúni erte turyp, ǵusyl quıynyp, aıt namazyna qatysý – paıǵambarymyz Muhammedtiń (oǵan Allanyń salaýaty men sálemi bolsyn) súnneti.
Osy rette elimizdiń barsha azamatyn múbárak meıramnyń qurmeti úshin múgedekterge, jetimder men jesirlerge, qaraýsyz qalǵan qarttarǵa qaıyrymdylyq jasaýǵa shaqyramyn.
Alla taǵala duǵa-tilekterimiz ben saýapty isterimizdi jáne shalǵan qurbandyqtarymyzdy qabyl etkeı! Ámın!
Erjan qajy MALǴAJYULY,
Qazaqstan musylmandary dinı basqarmasynyń tóraǵasy,
Bas múftı
