Jıyn barysynda ótken oqý jyly qorytyndylanyp, jas urpaqty tárbıeleý men oqytýdaǵy ustazdardy tolǵandyryp júrgen ózekti máseleler men aımaqtaǵy bilim berý júıesin jetildirýdegi negizgi maqsattar men mindetter aıqyndalyp, jalpy respýblıkada bilim salasyna engizilip jatqan jańalyqtar tanystyryldy.
Dástúrli tamyz konferensııasyna Qyzylorda oblysynyń ákimi Qyrymbek Kósherbaev, QR Bilim jáne ǵylym mınıstrliginiń Mektepke deıingi jáne orta bilim departamentiniń dırektory Sholpan Karınova, Ybyraı Altynsarın atyndaǵy Ulttyq bilim akademııasynyń vıse-prezıdenti Marııamkúl Muqataeva, «Nazarbaev Zııatkerlik Mektepteri» derbes bilim berý uıymy Bilim berý baǵdarlamalary ortalyǵynyń dırektory Janar Abdıldına, QR Parlamenti Senatynyń depýtaty Murat Baqtııaruly, ardager ustazdar t.b qatysty.
Aıta keteıik, tamyz keńesine oblys aýdandary da onlaın rejımde qatysty.
Aımaq basshysy Rýhanı jańǵyrýdyń basty tiregi -ustazdar, al, onyń iske asyrylatyn negizgi alańy – bizdiń oqý oryndary ekendigin atap ótti.
- Men búgin Sizderdiń aldaryńyzǵa oblystyń ákimi ǵana emes, ózderińiz jaqsy biletin “Rýhanı jańǵyrý” baǵdarlamasyn iske asyrý jónindegi Ulttyq komıssııanyń múshesi jáne osy baǵdarlamanyń ár taraýy men ár qadamyn shyn júrekten jaqtaýshy, janashyr azamat retinde kelip turmyn. Rýhanı jańǵyrýdyń mektep jáne ustazdar úshin asa mańyzdy bolýynyń birneshe sebebi bar. Rýhanı jańǵyrý – memleket pen qoǵamdy ishinen jańartýdyń, adamnyń sanasyn ózgertý arqyly elge jańa sapa berýdiń álemde balamasy joq, erekshe baǵdarlama. Bul baǵdarlama Ulttyq sıpatta, biraq, jeke tulǵalyq deńgeıde iske asady. Iаǵnı, qoǵamdyq sana, jeke tulǵalyq sananyń ózgerýi negizinde iske asady. Sondyqtan da, bul baǵdarlamanyń ár qadamy urpaq, ıaǵnı tulǵa tárbıeleý, azamat ósirý, maman daıyndaý jumysymen qatar júredi,- dedi oblys ákimi Qyrymbek Kósherbaev.
Aıta keteıik, oblysta bilim berý salasyn qarjylandyrý jyl saıyn ósip keledi. Sala bıýdjeti 2015 jyly 63,9 mlrd. teńgeni quraǵan bolsa, 2016 jyly ol 70,0 mlrd.-qa jetip, 2017 jyly bilim berý salasynyń qarjysy 2013 jylmen salystyrǵanda 2 esege ósip, 89,3 mlrd. teńgeni qurady. Oblystaǵy bilim berý qyzmeti jalpy sany 293 bolatyn 9 bastaýysh, 24 negizgi orta, 260 jalpy bilim beretin orta mektepterde júrgiziletin bolady. Onyń ishinde shaǵyn jınaqtalǵan mektepter sany – 22.
Oblystyq bilim basqarmasynyń basshysy Baqytjan Saılybaevtyń aıtýynsha sońǵy úsh jylda oblys túlekteri UBT qorytyndysy boıynsha joǵary ball jınap, respýblıkadaǵy úzdik bestiktiń quramyna enip otyr. Máselen, byltyrǵy oqý jylynda mektep bitirgen 6564 túlektiń 95% koledjder men ýnıversıtetterde memlekettik bilim granty jáne aqyly negizde bilimderin jalǵastyrýǵa qol jetkizdi. 2017 jyly 6196 túlektiń 4123-i jańa formattaǵy UBT synaǵynan ótip, ortasha 82,4 balmen respýblıka boıynsha óz bilim deńgeıleriniń joǵary ekendigin taǵy da dáleldedi.
Konferensııa barysynda QR Bilim jáne ǵylym mınıstriliginiń Mektepke deıingi jáne orta bilim departamentiniń dırektory Sh. Karınova, A. Altynsarın atyndaǵy Ulttyq bilim akademııasynyń vıse-prezıdenti M. E. Muqataeva, oblystyq bilim basqarmasynyń basshysy B.Saılybaev baıandama jasap, aýdandardaǵy ustazdar onlaın-rejımde ózderiniń kókeıtesti saýaldaryn joldady.
Esterińizge sala keteıik, Qyzylorda oblysynda úsh aýysymdy mektepter máselesi men 3 pen 6 jas aralyǵyndaǵy balalardy mektepke deıingi bilim berýmen qamtý tolyǵymen sheshildi. Endi jyl sońyna deıin apatty jaǵdaıdaǵy mektepter máselesi túbegeıli sheshiledi dep josparlanýda.
