Qatysýshylar 5 kún ishinde Ashat Abjanov, Asqar Áskerov, Svetlana Drýz, Aslan Esjanuly sekildi tabysty kásipkerlerdiń trenıngterinde ınnovasııalyq tehnologııalar, kraýdfandıng, oratorlyq, kópshilik aldynda sóıleý óneri, Elbasynyń «Rýhanı Jańǵyrý» baǵdarlamasyndaǵy mańyzdy oılardyń biri retinde sana jańǵyrtýyna baılanysty taqyryptarǵa sholý jasap, bilimderin keńeıtti. Taǵylymdamadan ótý baǵdarlamasy, sonymen qatar, aldyńǵy qatarly shaǵyn jáne orta bıznes kásiporyndaryna baryp, tájirıbe jınaqtaýdy kózdeıdi.
Delegattar múmkindigi shekteýli jastarǵa arnalǵan «Asar» fıtnes klýbynda, «Tıýrskıı dvorık» demalys bazasynda, «Qaınar-AKB» akkýmýlıator zaýytynda, «Arlen» bala-baqshasynda, «TANDOOR» kafesinde jáne t.b. kásiporyndarda boldy. Oǵan qosa, QR Almaty oblysynyń «Atameken» Ulttyq kásipkerler palatasynda bolyp, ShOB qoldaý jóninde memlekettik sharalar tizbegimen tanysty. Taǵylymdamanyń jabylý saltanatynda barlyq qatysýshylarǵa jobaǵa qatysqany jóninde sertıfıkattar tabystaldy.
N.Á.Nazarbaev «Bolashaqqa baǵdar: Rýhanı jańǵyrý» maqalasynda aıtqandaı, sananyń ashyqtyǵy – ol jańa tehnologııanyń aǵyny alyp keletin ózgeristerdiń bárine daıyn bolý degen sóz. Taıaýdaǵy on jylda bizdiń ómir saltymyz: jumys, turmys, demalys, baspana, adamı qatynas tásilderi, qysqasy, barlyǵy túbegeıli ózgeredi. Biz buǵan da daıyn bolýymyz kerek. Jastar kásipkerligine qoldaý kórsetý maqsatynda Qazaqstan jastarynyń kongresi jáne QR din isteri jáne azamattyq qoǵam mınıstrligi jyl saıyn jastar bıznes-taǵylymdamalaryn ótkizip keledi. Bul joba jastardyń óz isterin ashýǵa, bolýy múmkin táýekelderdi esepteýge jáne basqa da kásipkerlermen tájirıbe almasýǵa múmkindik beredi. 2016 jyldan beri búginde 90 jas qyz-jigitter taǵylymdamadan sátti ótti. Jobany júzege asyrýdaǵy barlyq seriktesterimizge alǵys bildiremin», - dep «Qazaqstan jastarynyń kongresi» ZTB-niń atqarýshy dırektory Sábıtov Aıdyn Maratuly shara mańyzdylyǵyn atap ótti.
Taǵylymdamanyń basty maqsaty – jastardyń ınnovasııalyq jáne kásipkerlik áleýetin arttyrýǵa járdemdesý jáne ashý, búgingi kúni jumys barysyndaǵy ShOB kásiporyndarynyń is-sharalarymen tanystyrý arqyly jas kásipkerlerdiń quzyrettiligin joǵarylatý.
Jobanyń eń jas qatysýshylarynyń biri Almatylyq Muhıt Asqaruly: «Meniń jasym 19-da. Men «Qazaqstanwatches» ınternet-dúkeniniń jetekshisimin, áleýmettik jeliler jáne ınternet arqyly qol saǵattaryn satýmen aınalysamyn. Jastar bıznes-taǵylymdamalary jobasynan bıznestegi basty maqsattaryma jetýge jaqsy keńester, kásibı konsýltasııa jáne óz kásibimdi damytýǵa arnalǵan aqparatqa keńinen qanyq boldym. Uıymdastyrýshylarǵa óte rızamyn».
Jastar kásipkerliginiń damýy zamanaýı kezeńde halyq arasyndaǵy eńbekpen qamtý kórsetkishteriniń joǵarylaýyna jáne bilikti qyzmetkerler daıyndaýǵa ǵana emes, elimizdiń ınnovasııalyq damý jolyna tezirek ótýine jaǵdaı jasaýy qajet.
Memlekettiń ekonomıkalyq turaqtylyǵynyń negizgi tiregin dál osy bıznes quraıdy. Jastarǵa osy nárse oqytý barysynda-aq túsindirip, qajetti quzirettilikteriniń qalyptasýyna kómek berý óte mańyzdy.
