Arqalyq qalasy men Amangeldi aýdany óńirindegi Keıki batyrǵa, 1916 jylǵy ult-azattyq kóteriliske baılanysty tarıhı oryndardy aralaýdy, Keıki batyrdyń jumbaǵy mol ómirimen, erlik isterimen tanysýdy baspasóz týryn ótkizgen «Jas ulan» balalar men jasóspirimder ortalyǵy aldyna maqsat etip qoıdy. Týrǵa qatysýshylar aldymen Keıki batyrdyń qurylysy júrip jatqan kesenesine bardy, jumystyń aıaqtalýǵa jaqyn ekenin kórdi. Qazir keseneniń aınalasyn kógaldandyrý, abattandyrý jumystary júrip jatyr. Batyrdyń bas súıegin jer qoınyna tapsyrýdy rásimdeý sharasy ótetin 17 qyrkúıekke deıin kesene tolyq daıyn bolady.
Munan týrǵa qatysýshylar mingen «Gazel» men TBRÝ geologtarynyń júrdek mashınasy Qaraǵandy oblysynyń Ulytaý aýdany óńirinde ornalasqan Dýlyǵaly meshitine bet aldy. Keıki batyr jáne onyń mergenderi, zamandastary kóteriliske attanar aldynda Qulmuhambet ıshan saldyrǵan Berdikeı ıshan meshitine kelip, aqsarbas aıtyp, bata alyp, taraǵan eken. Qulmuhambet ıshan kesenisiniń ishinde Keıki qatysqan jıynda soıǵan qoshqardyń bas súıegi 100 jyldan beri saqtalǵan. Baspasóz týryna qatysqandar osy jerge qonyp, erteńine Qulmuhambet ıshan mazaryna baryp, quran baǵyshtady, ol saldyrǵan meshitti kórdi. О́tken ǵasyrdyń basynda salynǵan meshittiń qazir qabyrǵalary ǵana qalǵan. Halyqtyń yqylasymen arnaıy qurylǵan qor qarjysyna Buharadan kelgen qurylysshylar men sáýletshiler meshitti qaıta qalpyna keltirý jumystaryn qolǵa alypty. Qazir sol jerde kirpish daıyndalyp jatyr.
Baspasóz týryna qatysýshylar jolda Amankeldi Imanov belgisine, Biráli men Ahmet kesenelerine, Keıki batyrdyń qaza bolǵan jerine, Rahmet baı kesenesine, Kóshimbek kesenesine, Úrpek aýylyndaǵy Amankeldiniń shtab-páterine soqty. Árýaqtarǵa quran baǵyshtady, tarıhı oryndar týraly ólketanýshylar aıtqan qyzyqty derekterdi, áńgimelerdi tyńdady. Sonymen qatar baspasóz týryna qatysýshylar qaıtar jolda Amankeldi aýdanyndaǵy Torǵaı svastıkasyn–úshaıyryǵyn tamashalady.
Baspasóz týrynyń úshinshi kúni Arqalyq qalasynda sapar barysyn qorytyndylaǵan «dóńgelek ústel» májilisin ótkizdi.
Názıra JÁRIMBET,
«Egemen Qazaqstan»
Qostanaı-Amankeldi-Arqalyq-Ulytaý-Arqalyq-Qostanaı
