27 tamyzda Qostanaı temirjol aýrýhanasy basshylary men mamandary poıyzdy Aqmola oblysynyń Esil stansasynan kútip aldy. Endi ol arnaıy jasalǵan kestege sáıkes Qostanaı oblysynyń 11 stansasyna baratyn bolady.
«Poıyz elimizdiń Konstıtýsııa kúni qarsańynda kelip otyr. Munyń ózindik máni bar deýge bolady. Elimizdiń árbir azamatynyń qoljetimdi sapaly medısınalyq kómek alýǵa konstıtýsııalyq quqy bar. Ortalyqtardan tym shalǵaıda jatqan aýyldar men basqa da eldi mekenderde turǵyndardyń ýaqytyly medısınalyq kómek alýy keıbir dáriger-mamandardyń jetimsizdigine oraı qıyndap ketedi. «Salamatty qazaqstan», «Densaýlyq» poıyzdarynyń uıymdastyrylýy halyqqa medısınalyq kómektiń sapasyn kóterýde óte tıimdi sheshim bolyp otyr. Oǵan bizdiń aýrýhana belsendi qatysyp keledi» dedi «JGMK» aksıonerlik qoǵamynyń fılıaly–Qostanaı temirjol aýrýhanasynyń bas dárigeri Qarataı Jaısańbaev.
Poıyz ár stansada toqtap, shalǵaı eldi mekender turǵyndaryna medısınalyq qyzmet kórsetetin bolady. Poıyzda gınekolog, nevropatolog, kardıolog, hırýrg, oftalmolog, pedıatr, otolarıngolog, stomatolog, rentgenolog, endoskopıst, vrach ÝZI sekildi on bes maman bar.
«Bizdiń aýrýhana mamandary «Salamatty Qazaqstan», «Densaýlyq» mamandandyrylǵan poıyzdarynda jyl saıyn qyzmet kórsetip júr. Tájirıbesi mol, bilikti mamandar qyzmetine turǵyndar rıza. Dárigerler demalyssyz jumys isteıtin bolady, olar temirjolshylar men shalǵaı aýyldardyń turǵyndaryn kóbirek qamtýdy basty maqsaty etip ustanyp otyr. Medısınalyq kómektiń barlyǵy aqysyz kórsetiledi. О́ziniń densaýlyǵy úshin alańdaıtyn, biraq oblys ortalyǵyndaǵy emhanalarǵa barýǵa múmkindigi joq azamattar tekserilýine, dárigerlerge ózin tolǵandyrǵan suraqtaryn qoıýyna bolady» deıdi Qostanaı temirjol aýrýhanasy bas dárigeriniń orynbasary Márzııa Esqazına.
«Salamatty Qazaqstan» poıyzy 16 qyrkúıek kúni Toǵyzaq stansasynda Qostanaı oblysyndaǵy jumysyn aıaqtaıdy.
Názıra JÁRIMBET,
«Egemen Qazaqstan»
