Qazaqstan Prezıdenti MAGATE-niń tómen baıytylǵan ýran bankiniń ashylýyna oraı elimizge kelgeni úshin Iý.Amanoǵa rızashylyq bildirdi.
– Búgingi shara – tómen baıytylǵan ýran bankin qurý jóninde kóp jyl boıy birlese atqarǵan jumysymyzdyń nátıjesi. Qazaqstan úshin bul oqıǵanyń mańyzy zor, – dedi Memleket basshysy.
Nursultan Nazarbaev Qazaqstan jahandyq ıadrolyq qarýǵa qarsy kúres qozǵalysynyń kóshbasshysy sanalatynyn atap ótti.
– Biz quramynda ýrany mol shıkizatqa ıe memleket retinde atom energııasyn beıbit maqsatta paıdalanýǵa yqpal etetin bolamyz, – dedi Qazaqstan Prezıdenti.
Sondaı-aq, Memleket basshysy elimizdiń Agenttikpen yntymaqtastyǵy jan-jaqty jáne berik ekenin aıtty.
MAGATE-niń bas dırektory delegasııaǵa kórsetken qonaqjaılyq úshin Nursultan Nazarbaevqa alǵys bildirdi.
– Bul shara, eń aldymen Sizdiń jeke qoldaýyńyz ben qatysýyńyzdyń, sondaı-aq bizdiń jemisti yntymaqtastyǵymyzdyń arqasynda iske asyp otyr, – dedi Iý.Amano.
Sonymen birge, Agenttiktiń bas dırektory tómen baıytylǵan ýrandy saqtaıtyn ǵımarat ashýmen qatar, bul shıkizatty satyp alý jáne ony tasymaldaý máseleleri de mańyzdy ekenin atap ótti.
