Mýzeıdiń ashylýy Elbasy N. Nazarbaevtyń «Bolashaqqa baǵdar: rýhanı jańǵyrý» atty kólemdi jobasyn júzege asyrýmen qatar, quqyqtyq tártip áskeriniń jaýyngerlik dástúrin sarbazdar arasynda keńinen nasıhattaý sharasymen ózara úndestikte uıymdastyrylǵan. Sondyqtan da jıyndy ashqan Ulttyq ulannyń Bas qolbasshysy general-leıtenant Rýslan Jaqsylyqov Ulttyq ulan qurylýynyń 25 jyldyǵy quqyqtyq tártip áskeri úshin taǵy bir eleýli oqıǵamen tolyǵyp otyrǵanyn atap ótti.
«Bul – Qazaqstan Respýblıkasynyń Konstıtýsııasy kúni qarsańynda jańa beınedegi Ulttyq ulannyń Ortalyq mýzeıiniń ashylýy. Men Táýelsiz Qazaqstan turǵyndarynyń qaýipsizdigin qamtamasyz etip, óziniń erjúrek erligimen qanshama azamattardy qutqarǵan jaýyngerlerdi maqtan tutamyn. Halyq óz batyrlaryn tanýy tıis desek, olardyń esimderi áskerı bólimderdegi jaýyngerlik Dańq bólmeleri men búgingi Ortalyq mýzeıde máńgi saqtalatyn bolady», dedi general-leıtenant.
Sodan keıin sóz alǵan Armııa generaly Muhtar Altynbaev Ulttyq ulan mýzeıiniń ashylýy elimizdiń Qarýly Kúshteriniń tarıhynda aıtýly oqıǵa ekenin aıtty.
«Búgingi shara Elbasy N.Nazarbaevytyń rýhanı jańǵyrý boıynsha memlekettik reformalarymen toǵysyp tur. Ekonomıkalyq jáne áleýmettik jetistiktermen qatar, biz óz tarıhymyzdy bilýimiz qajet. Bul – biz ben sizdiń damýymyzdyń negizi», dedi Muhtar Qapashuly.
Ortalyq mýzeı negizgi úsh zal men muraǵattyq qujattardan turady. Onyń birinshisi – Ulttyq ulan tarıhynan syr shertip, ekspozısııalar quqyqtyq tártipke qatysty áskerıler ómiriniń ótken kezeńin qamtysa, ekinshi zalda – Qazaqstan Respýblıkasy Ulttyq ulanynyń búgingi bet-beınesi jurtshylyq nazaryna usynylady. Atap aıtqanda, «Ulttyq ulan – el aıbyny!» uranymen quqyqtyq tártip áskeriniń damý satylaryna arnalǵan. Al úshinshi zal – kórme zaly. Bul jerdegi ekspozısııalarda elimizdiń óz Táýelsizdigin alǵannan keıingi Ulttyq ulan jaýyngerleriniń jasaǵan erlikteri aıshyqtalǵan.
Syry ketse de, syny ketpegen mýzeı eksponattarynyń qatarynda, jaýyngerlik týlar men orden-medaldar, qarý-jaraq kolleksııalary, jaýyngerlerdiń búgingi áskerı kıim úlgileri bar. Sondaı-aq, kórkem bezendirilgen zamanaýı stendterde Ulttyq ulannyń qurylymdyq bólimsheleriniń tarıhy men áskerı-jaýyngerlik áreketterin beıneleıtin fotosýretter qoıylǵan.
Nurlybek DOSYBAI,
«Egemen Qazaqstan»
