Jańa ǵımarat óńirdiń aýdan, qalalarynan kelip jumys isteıtin jastar arnalǵan. Bul úı aımaqtyq «Jańa serpin» baǵdarlamasy aıasynda jumyspen qamtylǵan azamattar úshin qarastyrylǵan. Budan bólek, dáriger, muǵalim sııaqty oblys ortalyǵynda tapshy maman ıeleriniń osy jerge ornalasýyna múmkindigi bar dep habarlady Mańǵystaý oblysy ákimdiginiń baspasóz qyzmeti «egemen.kz» tilshisine.
Jataqhananyń ashylýyna Mańǵystaý oblysynyń ákimi Eraly Toǵjanov, oblystyń memlekettik organdarynyń jáne «NKOK» kompanııasynyń ókilderi qatysty.
- Elbasy Nursultan Ábishuly jastarǵa jaǵdaı jasaý týraly máselesin kún tártibine qoıdy. Sebebi, jas azamattarǵa biz qoldaý kórsetýimiz kerek. Jyl saıyn túrli salaǵa, sonyń ishinde áleýmettik salaǵa bilikti mamandar asa qajet. Máselen, bir ǵana densaýlyq salasynyń ózine 245 jas maman qajet. Búgin «NKOK» kompanııasynyń demeýshiligimen jastarǵa arnap osyndaı 500 oryndyq jataqhana salyndy. Barshańyzdy osy qýanyshty kúnmen quttyqtaımyn! Elimizdiń erteńi – jastar. Sondyqtan, sizderge úlken senim artamyz. Barlyq bastamalaryńyzǵa sáttilik tileımin, - dedi quttyqtaý sózinde aımaq basshysy.
Jataqhana ǵımaraty úsh bloktan turady, bloktyń ár qatarynda eki jáne úsh adamnyń turýyna arnalǵan turǵyn bólmeler, sanıtarlyq toraptar men kıim-keshek saqtaıtyn oryndar bar. Jańa qonystanýshylar úshin turǵyn bólmelerden basqa býfet, jumys kabınetteri, júk saqtaý kameralary, zat qoıatyn bólme, jınalys bólmeleri men qysqy baq qarastyrylǵan. Bólmeler balkondarmen qamtylǵan jáne turýǵa jaıly. Nysan bıýdjettik salada jumys isteıtin qyzmetkerlerdi baspanamen qamtý máselesiniń ózektiligin azaıtýǵa septigin tıgizedi.
Gúlaıym ShYNTEMIRQYZY,
«Egemen Qazaqstan»
