Mamandyqtardyń ishinde orys tili men ádebıeti pániniń muǵalimi mamandyǵyna 36 jumys orny bos eken. Ásirese, Maqtaral aýdanynda matematıka pániniń muǵalimi, bastaýysh synyp muǵalimi, aǵylshyn tili pániniń muǵalimi jáne hımııa pániniń muǵalimi mamandyqtaryna suranys óte joǵary.
«Jármeńkege qatysa almaǵandar aýdandyq "Jumyspen qamtý ortalyǵy" KMM-ne baryp, jumys izdeýshi retinde tirkelip, óz túıindemelerin qaldyra alady. Bos vakansııa shyqsa jumyssyz azamattarǵa dereý habarlaımyz», dedi aýdandyq Bilim bóliminiń mamany Tursynbaı Myrzalıev.
Jalpy, jármeńkede jumys izdeýshi retinde tirkelip, qujattaryn tapsyryp jatqan azamattardyń qatarynda jastar kóp. Ál-Farabı atyndaǵy Qazaq Ulttyq ýnıversıtetiniń bıologııa fakýltetin bıyl úzdik bitirip, qyzyl dıplommen týǵan jerine oralǵan Aıgúl Ibragımovanyń túıindemesin kórgen mektep dırektorlary óz mekemelerine jumysqa turýǵa shaqyryp otyr. Bilim bólimi mamandarynyń aıtýynsha, osy aptanyń sońyna deıin pedagogıkalyq bos jumys oryndarynyń barlyǵyna jumys izdeýshi azamattar ornalastyrylatyn bolady.
Aıta keteıik, búgingi tańda Maqtaral aýdanynyń 125 mektebinde 9 myńnan asa muǵalim jumys jasaıdy.
