Arnaıy mýzykalyq qurylǵylarmen jasaqtalǵan qoǵamdyq kólik Astana qalasynyń kórikti jerleri men saıabaqtaryna aıaldap, ónerpazdar ońtústikten shyqqan jergilikti sazgerlerdiń tanymal ánderinen shashý shashty.
«Ońtústik- ónerdiń altyn ordasy. Sondyqtan búgingi án sherýimizdi qala qonaqtary men turǵyndaryna arnaıy tartý retinde usynyp otyrmyz. «Ońtústiktiń 7 keremeti» aıasynda uıymdastyrylǵan sharanyń maqsaty – qazaq ónerin nasıhattap, Elbasymyzdyń «Bolashaqqa baǵdar: «Rýhanı jańǵyrý» maqalasyndaǵy «Týǵan jer» baǵdarlamasyna qoldaý bildirý», - deıdi oblystyq Mádenıet basqarmasynyń basshysy Nurbolat Ahmetjanov.
Merkelik óner dýmanynyń sherýshileri «Dýman» oıyn-saýyq ortalyǵynan bastap, «Máńgilik el» qaqpasy jáne «Han shatyr», «Mega Silk Way» oıyn-saýyq ortalyqtary, QR Ulttyq mýzeıi jáne «Báıterek» alańyna deıin júrip ótti. Astanalyq turǵyndarǵa Ońtúsiktiń án sálemin joldaýǵa Sh.Qaldaıaqov atyndaǵy oblystyq fılarmonııa, oblystyq opera jáne balet teatrynyń belgili ánshilerinen quralǵan 30-dan asa ónerpaz qatysty.
Aıta keteıik, 29-31 tamyz aralyǵynda «Beıbitshilik jáne kelisim» saraıynda «Ońtústiktiń ónimderi» taýar óndirýshilerdiń kórmesi men «Jer kindigi - Qazyǵurt» atty kórkemóner kórmesi kópshilik nazaryna usynylǵaly otyr. Sondaı-aq, «Túrki eliniń túp tamyry – Ońtústikten mereıli Astanaǵa sálem!» óner kerýeni, «Sálem Astana!, Sálem, EKSPO!», «Ońtústik ázilderi» shoý-konsertteri uıymdastyrylady.
