Senat spıkeri óz sózinde Pagýosh konferensııasy ashylǵan sátinen bastap óziniń ǵylymı ıdeıalarymen, ıadrolyq qarýdan azat álem qurý máseleleri jónindegi asa mazmundy jáne syndarly pikirsaıystarymen tanymal ekenin atap ótti. Tóraǵa túrli memleketterdegi azamattardyń, onyń ishinde jastardyń arasynda qarýsyzdaný ıdeıalaryn keńinen taratýda Pagýosh qozǵalysynyń rólin joǵary baǵalady.
«Bul forýmdy bizdiń elde ótkizýge senim bildirilgeni jaıdan-jaı emes, – dedi Q.Toqaev. – Búgin halyqaralyq qoǵamdastyq Iаdrolyq synaqtarǵa qarsy is-qımyldyń halyqaralyq kúnin atap ótýde. Bizdiń Pagýosh qozǵalysymen jemisti únqatysýymyz jalǵasyn tabatynyna senimdimin».
Tóraǵa, sondaı-aq, ıadrolyq qarýǵa qarsy halyqaralyq qozǵalysqa Qazaqstannyń jańasha serpin bergenine de toqtalyp ótti. «26 jyl buryn dál osy kúni Prezıdent Nursultan Nazarbaevtyń tarıhı Jarlyǵyna sáıkes Semeı ıadrolyq polıgony jabylǵan bolatyn. Ol qarýdy taratpaý jáne qarýsyzdaný salasyndaǵy jahandyq kúsh-jigerde basty ról atqarady», – dedi Q.Toqaev.
Sózin aıaqtaı kelip Q. Toqaev Qazaqstan Respýblıkasy beıbitshilik pen qaýipsizdikti nyǵaıtý úshin Pagýosh qozǵalysymen nátıjeli baılanystardy jalǵastyra beretinine senim bildirdi.
Álısultan QULANBAI,
«Egemen Qazaqstan»
