Ortalyq kommýnıkasııalar qyzmeti alańynda brıfıng ótkizip, jýrnalısterdiń saýalyna jaýap bergen Ońtústik Qazaqstan oblysy ákiminiń orynbasary Ulasbek Sádibekov elordada uıymdastyrylatyn sharalardyń legi Elbasy Nursultan Nazarbaevtyń «Bolashaqqa baǵdar: rýhanı jańǵyrý» atty baǵdarlamalyq maqalasyndaǵy basymdyqtarmen ushtastyryla otyryp ázirlengenin atap ótti. Basty maqsat – oblystyń mádenıetin, rýhanııatyn, áleýmettik-ekonomıkalyq múmkindikteri men taýarlaryn, tarıhı-mádenı oryndaryn jáne týrıstik áleýetin jurtshylyqqa keńinen tanystyrý.
Oblystyń Astanadaǵy kúnderi keshe EKSPO halyqaralyq kórmesinde ótken bıznes-forýmmen ashyldy. Oǵan shetelderdiń Qazaqstanda jumys istep jatqan 30-dan astam elshisi qatysyp, elimizdegi kásipkerliktiń jaı-kúıin, bıznes pen osy saladaǵy jobalarǵa qoldaý kórsetý máselelerin talqylady.
Oblys ákiminiń orynbasary bes kúnge sozylatyn ońtústik óńirdiń kúnderi aıasynda ótkiziletin 43 sharanyń ishinde jeti sharany erekshe atap kórsetti. Bul sharalar toptamasyn ózderi «Ońtústiktiń 7 keremeti» dep atapty.
Onyń birinshisi – Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy sheńberinde oblys ákimi Janseıit Túımebaevtyń ıdeıasymen shyǵarylǵan «Tulǵa. Táýelsizdik. Tarıh», «Jahan tanyǵan jeti tulǵa» kitaptarynyń tanystyrylymy jáne búgin saǵat 11.00-de Oqýshylar saraıynda ótetin «Kúsh atasy – Qajymuqan» anımasııalyq fılminiń tusaýkeseri.
Ekinshisi – «QazMunaıGaz» kompanııasynyń ǵımaratynan bastap, «Nurjol» gúlzary boıymen «Báıterek» alańyna deıin júrip ótetin túıeler men attar kerýeni. «Túrki eliniń túp tamyry – Ońtústikten mereıli Astanaǵa sálem!» atty bul shara ejelgi tarıhymyzdan syr shertetin jádigerlerdi jurtshylyqqa dáripteıdi.
Úshinshi keremet shara – 600 jas dombyrashynyń bir mezgilde oryndaıtyn kúmbir kúıler sherýi bolsa, tórtinshisi – 31 tamyz kúni «Qurban aıt» merekesine oraılastyrylǵan qoǵamdyq kólikterde, basqa da kópshilik oryndarynda ótkiziletin qaıyrymdylyq aksııasy.
Sondaı-aq, «Etnoaýylda» uıymdastyrylatyn sharalar da jeti keremettiń birinen sanalady.
Al 1-2 qyrkúıek kúnderi eki qabatty aǵylshyn stılindegi qyzyl avtobýs elordany aralaıdy. Bul kólik Astananyń kórnekti oryndaryna baryp, Máńgilik El, Saryarqa jáne basqa da basty kóshelerimen júrip ótedi. Bul da – jeti keremettiń qataryndaǵy shara.
Ońtústik Qazaqstan oblysynyń kúnderi qasıetti Qurban aıtpen tuspa-tus kelip otyr. Osyǵan baılanysty ońtústikqazaqstandyqtar qaıyrymdylyq sharalaryna kóbirek kóńil bólipti. 31 tamyz kúni osy óńirdiń jastary Astananyń qoǵamdyq kólikterinde jáne halyq kóp shoǵyrlanǵan qoǵamdyq oryndarda baýyrsaq pen tátti toqashtar taratady.
Ońtústik Qazaqstan oblysy kúnderinde jurtshylyqtyń asyǵa kútetini – aýylsharýashylyq ónimderiniń jármeńkesi ekeni belgili. Osy joly da olar jalpy quny 265 mln teńgeni quraıtyn 550 tonnaǵa jýyq azyq-túlik ákelipti. «Ásirese, arzan jemis-jıdek kóp ákeldik. О́ıtkeni, aldyńǵy jármeńkeler osy ónimderge suranys úlken ekenin ańǵartty», deıdi Ulasbek Sádibekov.
Ońtústik Qazaqstan oblysynyń aýylsharýashylyq ónimderiniń jármeńkesi 30, 31 tamyz kúnderi saǵat 9.00-den bastap, Beıbitshilik jáne kelisim saraıynyń aldynda ótse, 2,3 qyrkúıek kúnderi dál osy ýaqyttan bastap, «Qazaqstan» sport kesheni alańynda uıymdastyrylady.
Qonaqjaı ońtústik jurty astanalyqtardy atalǵan is-sharalarǵa belsene qatysýǵa shaqyrady.
Qymbat TOQTAMURAT,
«Egemen Qazaqstan»
