Atyraý oblystyq kəsipkerlik jəne ındýstrııalyq-ınnovasııalyq damý basqarmasynyń basshysy Aıqyn Eleýsizovtiń aıtýynsha, qazir memlekettik ındýstrııalyq-ınnovasııalyq damý baǵdarlamasy aıasynda 5 663 jumys oryny qurylǵan 3 trln teńgeniń 54 ınvestısııalyq jobasy júzege asý ústinde.
Basqarma basshysy QR Prezıdentiniń tapsyrmasyna səıkes ekonomıkanyń óńdeý jəne óndirý sektoryn damytýǵa basty nazar aýdarylyp otyrǵanyn aıtady. Sonyń nətıjesinde oblysta shıkizat baǵytynan óńdeý salasyna qaraı naqty qadam jasaldy. Indýstrııalyq-ınnovasııalyq damýdyń alǵashqy besjyldyǵynda 2010-2014 jyldary 66,9 mlrd teńgeniń 28 jobasy júzege asyrylyp, 2135 jumys oryny ashyldy.
2018 jyly 17,4 mlrd teńgeniń 4 jobasyn iske qosyp, 254 jumys orynyn qurý josparlanǵan. Odan bólek aımaq úshin ǵana emes, elimiz úshin mańyzdy taǵy bir joba - "QazMunaıGaz" О́K" AQ Atyraý munaı óńdeý zaýytyn qaıta qurý jəne jańǵyrtý júzege asyrylýda. Joba quny - 626 mlrd teńge, 767 jumys oryny qurylady. Jobanyń mehanıkalyq aıaqtalý merzimi 2017 jyldyń jeltoqsan aıy.
"Bıznestiń jol kartasy - 2020" baǵdarlamasy sheńberinde 1,74 mlrd teńgeniń ınjenerlik-kommýnıkasııalyq ınfraqurylymymen qamtýǵa memlekettik qoldaý kórsetildi, 2 156 mlrd teńge nesıeniń paıyzdyq tólemin sýbsıdııalaýǵa bólindi.
A.Eleýsizov qalyptasqan məselelerdi sheshý baǵytynda da jumystar júrip jatqanyn aıtady. 2015-2017 jyldary Qurmanǵazy aýdanyndaǵy "Dosjan jəne Kompanııa" JShS qamys-jońqa plıtasyn shyǵarý zaýytynyń jumysy toqtaýǵa məjbúr bolǵan.
- Atalǵan mekeme 2011 jyly iske qosyldy. 2013 jyly lamınattalǵan qamys-jońqa plıtasy shyǵaryla bastady. Bastapqy kezeńde zaýyt alynǵan qural-jabdyqtardyń tehnıkalyq talaptarǵa saı bolmaǵanyna qaramastan jumys istep turdy, - deıdi Aıqyn Eleýsizov.
- О́ndiris jelini tolyq aýystyrý qajettiligi týyndaǵan kezde toqtatyldy, ulttyq valıýta kýrsynyń ózgerýi salqynyn tıgizdi, jabdyqtar men plıtaǵa kerek jelim de qymbattady. Kəsipkerdiń qarjysy bolmady. Kelissózder nətıjesinde Reseıden jeke ınvestormen kelisim-shart jasaldy. Zań rəsimderine de biraz ýaqyt ketti. Qazir qajetti jabdyqtar ornatylyp, óndiristi jańǵyrtýǵa jaǵdaı jasaldy. Jaqynda jumys bastalady. Mekemeniń josparly qýatyna shyǵý mezgili 2018 jyldyń birinshi jartyjyldyǵyna josparlanǵan.
Baqytgúl BABASh,
«Egemen Qazaqstan»
