9 qyrkúıekke deıin Astana Opera teatrynda Djýzýppe Verdıdiń «Falstaf» operasy men Lıýdvıg van Bethovenniń Re Mınor, Or 125 №9 sımfonııasy kópshilik nazaryna usynylady. Osyǵan oraı ótken baspasóz jıynyna La Skala teatrynyń dırektory Aleksandr Pereıra, solıst Ambrodjo Maestrı, teatrdyń qoıýshy rejısseri Domıano Mıkeletto men mádenıet jáne sport mınıstri Arystanbek Muhamedıuly qatysty.
Áıgili kompozıtor Djýzýppe Verdıdiń úsh kórinisten turatyn «Falstaf» operasynyń tusaýkeseri 1893 jyly Mılandaǵy osy La Skala teatrynda ótken bolatyn. Opera jelisi qart mýzykanttarǵa arnalǵan «Casa Verdi» úıinde órbıdi. Qartaıyp, shaý tartqan ánshi Falstaftyń júregin mahabbat qııaly terbeıdi. Verdıdiń atalǵan kompozısııasy ańyzǵa aınalǵan Mılannyń jarqyn tirshiliginiń qaltarysty tusynan syr shertedi. Kezinde Verdıdiń ózi «meniń eń kórkem operam» dep ataǵan qoıylymnyń qoıýshy rejısseri – Damıano Mıkeletto, sýretshi-ssenografy – Paolo Fantın, kostıýmder boıynsha sýretshisi – Karla Tetı.
Áńgime arasynda La Skala teatrynyń dırektory Aleksandr Pereıra teatrdyń tabysty bolýynyń negizgi qupııasyna toqtaldy. Onyń aıtýynsha, «adamgershilik qasıet turǵanda teatr máńgi jasaı bermek».
– La Skalanyń tabysty bolýynyń bir syry – shyǵarmalardyń barlyǵy tiri daýysta oryndalady. Árıne sizder Plasıdo Damıngonyń oryndaýyndaǵy shyǵarmany dıskten de tyńdaı alasyzdar. Degenmen dısktegi mýzyka únemi bir qalyptan aýytqymaıdy. Jandy daýysta oryndap turǵan artıst árdaıym úzdik oryndap shyǵýǵa umtylatyndyqtan, shyǵarma óńi qulpyra túsedi, túrlenip, myń san qubylady, – deıdi dırektor. Al teatrdyń repertýarlyq baǵdarlamasy qos taraptyń arnaıy kelisimimen júzege asyrylǵan. – «Falstaf» operasy – eń kúrdeli shyǵarmalardyń biri. Qazaqstanǵa Falstaf partııasynyń úzdik oryndaýshylaryn tańdap ákeldik. Kóńildi, úni zor ártistiń biri – Ambrodjo Maestrıdi aıtýǵa bolady. №9 sımfonııasyn álemdi úndestikke shaqyrýǵa arnalǵan joldaýymyz dep qabyldaýǵa bolady. Al birlik búginde eń mańyzdy dúnıe.
Tanymal teatr ujymy Astanaǵa tolyq qurammen kelgenin aıta ketý kerek. Hor, orkestr, solıster men tehnıkalyq qyzmetti qosqanda, barlyǵy 260 adam.
«Teatrmen birge sahna dekorasııasy men jabdyqtar tıelgen 14 júk kóligi keldi. Daıyndyq jumystary sońǵy bir aptada qyzý júrip jatyr. Osy oraıda, teatrdyń barlyq shyǵynyn demeýshilerdiń qolǵa alǵanyn, qazaqstandyq taraptan qarjy bólinbegenin basa aıtqan jón», – dedi Mádenıet jáne sport mınıstri Arystanbek Muhamedıuly baspasóz máslıhatynda.
EXPO-2017 baǵdarlamasy aıasynda La Skala teatrynyń opera trýppasy, hor men sımfonııalyq orkestriniń alǵashqy gastroldik saparyna ıtalıandyq «Eni» energetıkalyq kompanııasy men «Samruk-Kazyna Trust» áleýmettik seriktestigi qoldaý kórsetip otyr.
Aıa О́MIRTAI,
«Egemen Qazaqstan»
