Qazaqstan teatrlary qaýymdastyǵynyń vıse-prezıdenti Ashat Maemırov Qazaqstanda jas rejıssýra ókilderi óte az degen syńarjaq pikirdiń bar ekenin basa aıtty. Osyndaı pikirge núkte qoıyp, talantty jas rejısserlerdiń shyǵarmashylyǵyna qoǵam men qalyń kópshiliktiń nazaryn aýdarý maqsatynda jas rejısserlerdiń tuńǵysh forým-festıvalin uıymdastyryp otyrǵandaryn jetkizdi. Tuńǵysh festıvalge qazaqtyń jańashyl teatr rejısseri Qaırat Súgirbekovtiń esiminiń berilýi de tegin emes.
«Qaırat Súgirbekovtyń fenomendigi sol, óziniń avtorlyq estetıkalyq teatrynyń modelin jasaǵan birden bir sýretker. Qazaqtyń teatrlyq rejıssýrasyna avangardtyq baǵytty ákeldi, jańashyl, ınnovasııalyq baǵytta jumys istedi. Qazaq dramatýrgııasynyń negizin salǵan J.Aımaýytov, M.Áýezov, M.Jumabaevtardyń shyǵarmalaryn sóılesýdiń rejısserlik erekshe jolyn kórsetti. Ǵ.Músirepovtyń «Qozy Kórpesh - Baıan Sulý» shyǵarmasyn «Mahabbat dastany» dep atap, qazaqtyń tarıhyn tereńinen alyp, túrkitildes memleketterge ábden tanys assosıasııalyq, metaforalyq teńeýlermen sahnalady. Sóıtip, sahnaǵa sımvolızmdi ákeldi. Bir jaǵynan erte ketken Q.Súgirbekovtyń esimin máńgi este saqtaý jáne Súgirbekov bastaǵan súrleý joldy jalǵastyratyn jas rejısserlardy kórsetýdi maqsat tutyp otyrmyz», - dedi Ashat Maemırov Ortalyq kommýnıkasııalar qyzmetinde ótken baspasóz máslıhatynda.
Irikteý kezeńinde jıyrmadan astam jumys qabyldanǵan. Olardyń arasynan Elik Nursultan, Dáýren Serǵazın, Dına Qunanbaıqyzy, Rústem Janyamanov, Bolat Abdrahmanov, Farhad Moldaǵalıev, Juldyzbek Jumanbaı, Gúlnáz Qamysbaeva, Meıram Habıbýllın, Aıdyn Salbanov syndy 13 jas rejısser tańdap alynǵan. Olar forým barysynda túrli pikirtalastar, leksııalar, sheberlik-synyptary men semınarlarǵa qatysady.
Baıqaýda Álııa Bópejanova, Dýlyǵa Aqmolda, Gúlsim Erǵalıeva, Mıras Ábil qazylyq etedi. Úzdik jumystarǵa Bas júlde, 1,2,3 oryndar, kórermender kózaıymy jáne ómirden erte ozǵan taǵy bir rejısser Rústem Esdáýletov atyndaǵy arnaıy syılyq beriledi.
2 qyrkúıek kúni Beıbitshilik jáne kelisim saraıynda I jas rejısserler forým-festıvaliniń ashylý saltanaty ótedi. Onda M.Áýezov atyndaǵy akademııa teatry «Mahabbat dastany» qoıylymyn kórsetedi.
Ashylýdan bólek, forým-festıval aıasynda Astana qonaqtary men turǵyndary alty kún boıy M. Áýezov atyndaǵy Qazaq Memlekettik akademııalyq drama teatry, Ǵ.Músirepov atyndaǵy balalar men jasóspirimder teatry, Respýblıkalyq akademııalyq nemis drama teatry, Astana Jastar teatry, Aqtóbe oblystyq Alaqaı teatry, S.Muqanov atyndaǵy Soltústik Qazaqstan oblystyq qazaq drama teatry , Shyǵys Qazaqstan oblystyq Jastar teatry, J.Shanın atyndaǵy oblystyq akademııalyq qazaq drama teatry, Almaty qalasy memlekettik qýyrshaq teatry, Atyraý oblystyq Mahambet О́temisuly atyndaǵy qazaq drama teatrlarynyń qoıylymdaryn tamashalaı alady.
