Ákim orynbasarynyń aıtýynsha, Qala kúnin qyrkúıek aıynda atap ótý jyl saıyn dástúrge aınalǵan. Bıyl negizgi merekelik sharalar 2-10 qyrkúıek aralyǵyna josparlanyp otyr. Sondaı-aq, 22 shildeden beri «Týǵan jer» aýdanaralyq kórkemóner festıvali Qadyr Myrza Áli atyndaǵy mádenıet jáne óner ortalyǵynyń amfıteatrynda ár senbi saıyn ótip jatyr. «Bul mereke bárimizge ortaq. Sondyqtan, ony óz deńgeıinde uıymdastyryp, ótkizýge barshamyz atsalysýǵa tıispiz», – dep atap ótti M.Nurjanov.
«Qala kúni-2017» merekesi aıasynda Instagram, Facebook, VK áleýmettik jelilerinde «Meniń súıikti Oralym» taqyrybyna eń úzdik fotosýret pen beınerolıkke baıqaýy, «Úzdik PIK», «Taza aýmaq», «Úzdik úı», «Taza podezd» nomınasııalary boıynsha «Jasyl qala» baıqaýy, Derbes mamandyqtar boıynsha «Úzdik maman» baıqaýy uıymdastyrylyp, Jaıyq ózeni jaǵasynda «Jaıyq sazy» dástúrli óner festıvali ótpek. Avtokólik sánqoılary «Avtotıýnıng Shoý» sharasyna qatyssa, Gagarın atyndaǵy kınoteatr bir apta boıy kórermenge otandyq fılmder usynady. 5 qyrkúıekte Jańa alańda «POP Simphony» konserti ótse, 6 qyrkúıekte Oral qalasy ákiminiń kýbogyna arnalǵan KVN festıvali jastardy Qadyr Myrza Áli atyndaǵy mádenıet jáne óner ortalyǵynyń amfıteatryna jınamaqshy. Merekelik sharalar aıasynda «Dombyra PARTY» festıvali, «Nurly jer» baǵdarlamasy boıynsha Zashaǵan kentinde 180 páterli kópqabatty turǵyn úı jáne memlekettik-jeke áriptestik baǵdarlamasy boıynsha Depovskaıa kóshesindegi 90 páterli kópqabatty turǵyn úıdiń kiltin tapsyrý sharasy, Oral qalasy ákiminiń kýbogyna arnalgan voleıboldan «Dostyq-Drýjba» halyqaralyq jarysy, qalanyń saýda ortalyqtarynda «Jeńildikter kúni» naýqany, teatrlyq baǵdarlama, Qazaqstannyń estrada juldyzdary Tóreǵalı Tóreáli, Erke Esmahan jáne Son Paskaldyń qatysýymen keshki konserttik baǵdarlama, merekelik otshashý, «Oral arýy-2017» baıqaýy, shaǵyn sáýlettik pishinderdiń jáne músinderdiń saltanatty ashylýy, «Dostyq alańy» festıvali (balalar shyǵarmashylyǵy festıvali, «Gorod masterov» sándik-qoldanbaly kórkemóneriniń kórmesi, jandy músinder, maırampazdar), Jaıyq ózenine bekire balyqtaryn jiberý, oblys aýdandarynyń aýyl sharýashylyq jármeńkesi, aýdan jáne aýyldyq okrýgteriniń buqaralyq sport sharalarynyń konserttik baǵdarlamasy, Qaraqat Ábildına jáne Qydyráli Bolmannyń qatysýymen retro-festıvaldiń konserttik baǵdarlama, «Týǵan jer» atty aýdanaralyq qorytyndy gala-konserti – osynyń bári Oral qalasy turǵyndary men shahar qonaqtaryn kútip tur.
Qazbek QUTTYMURATULY,
«Egemen Qazaqstan»
