Jerlesterimizdiń de múmkindigi az emes edi. Alaıda, yńǵaıy kelgenmen, gol soǵýdyń sáti túspeı qoıdy. Oıynnyń 17-mınýtynda Georgıı Jýkov jaraqatyna baılanysty alańdaǵy ornyn Maqsat Baıjanovqa bosatýyna týra keldi.
Jerlesterimizdiń tájirıbesiniń azdyǵy ma, áıteýir táp-táýir bastalǵan shabýyldardy nátıjeli aıaqtaı almaı jatty. Alǵashqy taımda Ǵafýrjan Súıimbaev pen Roman Murtazaevtyń oıynǵa tolyq ene almaǵany kórinip turdy. Birneshe tusta bergen pasy dál jetpeı, kelgen dopty jóndi ıgere almaı jatty. Al Serikjan Mujyqov ortalyq shabýylshynyń artynda oınasa da, alańnyń kez kelgen tusynan tabylyp, qorǵanysqa da jıi kómektesip júrdi.
Kezdesýdiń 31-mınýtynda Marko Veshovıch qaqpashy Davıd Lorııamen jeke shyǵyp, alǵashqy goldy saldy.
Araǵa alty mınýt salyp, 37-mınýtynda Islambek Qýattyń soqqysy esepti teńestiretindeı úmit syılaǵan edi, alaıda dop qaqpanyń mańdaıshasyna tıip, keri serpildi.
Ekinshi taımdy otandastarymyz jańa qarqynda bastady. 51-mınýtta eki birdeı gol soǵatyn múmkindik bolyp edi. Aldymen aıyp dobynan áýelegen dopqa qaqpashy toıtarys berse, araǵa 20 sekýnd salyp, Islambek Qýattyń basymen dál soqqy baǵyttaı almady.
Fýtboldaǵy "sen soqpasań, saǵan soǵadynyń" keri kelip, Chernogorııa kelesi shabýylynda-aq esepti ulǵaıtyp úlgerdi. Áýeleı kelgen aıyp dobyna Fatos Bechıraı birinshi jetip, qaqpanyń toryn týlatty.
Kóp uzamaı úshinshi gol da soǵyldy. Bul da aıyp dobynan. Taǵy da baspen soǵylǵan dop... Avtory - Marko Sımıch. Bas bapker Aleksandr Borodıýk daıyndyq kezinde osy máseleni negizge alýy kerek. Sebebi, soǵylǵan úsh goldyń ekeýi ekinshi qabattan kirdi.
Ary qaraı oıyn bir qarqynda órbip jatty. Al negizgi ýaqyttyń aıaqtalýyna bir jarym mınýt qalǵanda Islambek Qýattyń kezekti ret esep aıyrmasyn qysqartatyn múmkindigi bolyp edi, bul joly da tıimdi paıdalana almady. Qaqpashymen jeke qalǵannyń ózinde soqqysy tym bıik ketti.
Aıan ÁBDÝÁLI,
"Egemen Qazaqstan"
