Bokstan Germanııanyń Gambýrg qalasynda ótip jatqan álem chempıonatynyń jartylaı fınaldyq básekesi óz máresine jetti. Jartylaı fınalǵa shyqqan alty boksshymyzdyń úsheýi fınalǵa ótse, úsheýi qola júldeger atandy.
Keshegi jarys kúninde Qaırat Erálıev (56 kg) pen Amanqul Ábilhan (75 kg) fınalǵa shyqsa, búgin +91 kılo salmaqtaǵy Qamshybek Qońqabaev ta fınalǵa joldama aldy. Al Erjan Jomart (49 kg), Abylaıhan Júsipov (69 kg) jáne Vasılıı Levıt (91 kg) jartylaı fınalda qarsylastarynan jeńilip, álem birinshiliginiń qola júldegeri atandy.
Endi, týrnırdiń fınaldyq kezdesýinde Qaırat Erálıev amerıkalyq boksshy Dıýk Raganpen judyryqtassa, Amanqul Ábilhan (75 kg) bıylǵy Eýropa chempıony ýkraınalyq Aleksandr Hıjnıak kúsh synasady. Al asa aýyr salmaqtaǵy boksshymyz Qamshybek Qońqabaev fınaldyq jekpe-jekte 2013 jylǵy álem chempıony ázerbaıjandyq Magomedrasýl Medjıdovpen altyn júlde úshin judyryqtasatyn bolady.
Aıta keteıik, dál qazirgi ýaqytqa deıin bokstan Qazaqstan quramasy - 3 qola, AQSh pen О́zbekstan boksshylary - 2 qola jáne Reseı, Ońtústik Koreıa, Ázerbaıjan, Ulybrıtanııa, Úndistan, Kolýmbııa, Armenııa, Ekvador, Grýzııa, Mońǵolııa, Germanııa, Kamerýn, Aýstralııa eliniń ókilderi - 1 qola medal enshiledi. Al fınalǵa kýbanyń - 7 boksshysy, О́zbekstan quramasynan - 4 boksshy, qazaqstandyqtardan - 3 boksshy shyqsa, Reseı, AQSh, Ýkraına, Fransııa, Irlandııa, Ázirbaıjan elderinen bir ǵana boksshy altyn júlde úshin kezdesý ótkizedi.
Fınal jekpe-jekteri 2-shi qyrkúıekke josparlanǵan.
