Búgin bokstan Germanııanyń Gambýrg qalasynda ótip jatqan álem chempıonatynyń fınaldyq básekesi bastaldy. Fınalǵa Qazaqstan quramasy sapynan úsh boksshy ótken bolatyn.
Fınalǵa qatysatyn boksshylarymyzdan rıngke birinshi bolyp 56 kılo salmaqtaǵy Qaırat Eralıev shyǵyp, el qorjynyna alǵashqy altyn júldeni saldy. Ol fınalda amerıkalyq Dıýk Rogandy 3:2 esebimen jeńip, bokstan 2017 jylǵy álem chempıony atandy. Aıta keteıik, 28 jastaǵy otandasymyz 2013 jyly Almatyda ótken álem chempıonatynda qola júlde ıelengen bolatyn.
Eske salsaq, búgin Amanqul Ábilhan (75 kg) men +91 kılo salmaqtaǵy Qamshybek Qońqabaev ta fınaldyq kezdesýlerin ótkizedi.
Buǵan deıin Jomart Erjan (49 kg), Abylaıhan Júsipov (69 kg) jáne Vasılıı Levıt (91 kg) jartylaı fınalda qarsylastarynan jeńilip, álem birinshiliginiń qola júldegeri atanǵan bolatyn.
