Ispanııa Koroldigi, Bolıvııa, Qazaqstan Respýblıkasyndaǵy jáne Reseı Federasııasyndaǵy Ispanııa elshilikteri, Máskeýdegi Servantes ınstıtýty uıymdastyrǵan sharaǵa qazirgi zamanǵy ıspandyq jáne bolıvııalyq kınoónerdiń túrli janrdaǵy úzdik fılmderi tańdap alyndy.
Kınokórsetilim repertýaryna kórkem kıno salasyndaǵy beldi marapattar men júldelerge ıe bolǵan óner týyndylary engen. Olardyń qatarynda «Ájimder», «Trýmen» «Jamandyq jaılamaǵan jer», «Arktıka», «Kózdi jumyp ómir súrgen ońaı», «Oba», «Stokgolm», «Kóterilisshiler» syndy kartınalar bar. Fılmderdiń kóbisi – jyl saıynǵy «Goııa» ulttyq júldesiniń jeńimpazdary men nomınanttary.
«Kórme qonaqtary Ispanııa men Latyn Amerıkasyndaǵy zamandastarynyń ómirimen etene tanyssyn degen nıetpen arnaıy osy fılmderdi ákeldik. Fılmder toptamasynda san alýan janrdaǵy kınony tamashalaýǵa bolady. Onyń ishinde komedııa, drama, fantastıka, shytyrman oqıǵa syndy janrlar bar. Bizdiń ómirimizdiń órnegi osylardan toqylǵan desek te bolady», dedi Ispanııa pavılonynyń dırektory Karmen Býeno.
Kınokórsetilimge negizinen 2011-2015 jyldar aralyǵynda shyqqan fılmder kirgen. «Ispanııa jáne Latyn Amerıkasy elderiniń kınematografy qarqyndy damyp keledi. Sońǵy jyldary nazar aýdarýǵa turarlyq birtalaı jumystar shyǵaryldy. Osy kórsetilimge arnap fılmderdi irikteý kezinde biz áriptesterimizben jáne seriktesterimizben birge uzaq ýaqyt boıy muqııat jumys júrgizdik. Bizdiń kıno jurtshylyqtyń kóńilinen shyǵyp, osynyń arqasynda kórme qonaqtarynyń jáne jalpy qazaqstandyqtardyń ıspan tildi elderdiń mádenıetine degen qyzyǵýshylyǵy artsa eken dep úmittenemiz», dedi Bolıvııa pavılonynyń komıssary Rafael Gonsales Aleman.
Ashat Raıqul,
"Egemen Qazaqstan"
