– Turǵyndar jınaǵan aqshalaryna páter alyp, erekshe qýanyshty. Bul memlekettik qoldaýdyń, salymshylardyń tilek-talap, eńbekteriniń nátıjesi. Barlyǵy kezinde depozıt ashyp, turaqty túrde aqsha salyp otyrdy. Qazir Turǵyn úı qurylys jınaq banki «Baspana» biryńǵaı tarıftik baǵdarlamasyn iske qosý arqyly taǵy da jeńil, tıimdi joldaryn jasaýda. Endi bank salymshylary qansha jyl aqsha jınap, qandaı paıyzben turǵyn úı zaemyn alatyndaryn ózderi sheshedi, – deıdi banktiń jergilikti fılıalynyń dırektory Talǵat Baıylov.
Jańa úıdegi páterdiń bir sharshy metri 140 000 teńgeni quraıdy. Baspanaǵa ıe bolý úshin bank klıentterine páter qunynyń 30 paıyzyna teń qarajatty esep-shottarynda jınaý kerek.
Mysaly, Natalıa Nedılkonyń otbasy quny 8,4 mıllıon teńge turatyn 2 bólmeli páter úshin 6 jyl boıy aqsha jınapty. Jınaǵandary 4,2 mıllıon teńge. Jetpeıtin qarajatty bank 6 jylǵa turǵyn úı zaemy túrinde beredi. Nesıe boıynsha aı saıyn 68 myń teńge tóleıdi.
2009 jyldan beri bankke qarajat jınaǵan salymshy Lázzát Sembekova da páter alyp, qýanyshty kóńil kúıde.
– Jyl basynan beri óńirde 109 myń sharshy metr úı paıdalanýǵa berildi. Qazir «Saryarqa» shaǵyn aýdanynda aýmaǵy 24 myń sharshy metr bolatyn 360 páterli úsh úı salynýda. Osyndaı ásem, sapaly úıler turǵyzǵan qurylysshylarǵa da rahmet. Qonys toıy qutty bolsyn! – dedi oblys ákimi B. Baqaýov.
Jergilikti fılıal málimetinshe, qazir óńirdiń árbir 15-shi turǵyny úıge dep aqsha jınaıdy. Qazirgi jınaqtaýshy qor 21,6 mlrd teńgeni quraıdy. Sondyqtan, bank qoljetimdi baǵamen taǵy da turǵyn úıler salmaqshy. О́ńirde «Nurly jer» baǵdarlamasynyń aıasynda jeke turǵyn úılerdiń de qurylysy bastaldy. Bul joba úshin oblys ortalyǵynda, Aqsýda, Ekibastuzda jer telimderi bólinýde.
Farıda BYQAI,
«Egemen Qazaqstan»
PAVLODAR
Sýretti túsirgen
Valerıı BÝGAEV
