Forým jumysyna 150 delegat qatysty. Olardyń qatarynda jas rejısserler, operatorlar, dərigerler, ekologtar, memlekettik qyzmetshiler, eriktiler, jas talanttar, stýdentter men Atyraý, Batys Qazaqstan, Aqtóbe, Mańǵystaý oblystary men Reseıdiń shekaralas oblystarynyń belsendi jastary bar.
Forýmda ssenarıst, rejısser Asqar Bısembın, ekolog Laýra Məlikova, QR Densaýlyq mınıstrligi qoǵamdyq densaýlyq saqtaý komıteti tóraǵasynyń orynbasary Berik Shərip, akter Sanjar Mədıev syndy basqa da tanymal adamdar oı-pikirlerin ortaǵa saldy.
Forým aıasynda qatysýshylar Atyraý oblysynyń qasıetti oryndaryna bardy. "Qazaqstannyń kıeli jerler geografııasyna" engen Saraıshyq qalashyǵyna saıahat jasady.
-Bul aıadaı jeriniń ózi ata-baba tarıhynan syr shertetin ǵajaıyp oryn,- dep əserimen bólisti akter Sanjar Mədıev. -Saraıshyq qalashyǵy jeti birdeı hanymyzdyń məńgilik mekeni, kınematograftar úshin óte qyzyqty oryn. Men osy jerdiń tarıhy týraly kórkem fılm túsirýdiń bastamashysy bolar edim.
Forým qatysýshylarymen kezdesýde Atyraý oblysynyń əkimi Nurlan Noǵaev mundaı sharalardy ótkizýdiń jas mamandar úshin mańyzdy ekenin aıtty.
-Jastar úshin óz salasynyń bilgirlerimen kezdesý oı-óristeriniń keńeıip, jańa ıdeıalarmen shabyttanýyna jol ashady,-dedi aımaq basshysy. -Mundaı sharalar oblysta jyl saıyn dəstúrli túrde ótedi. Memleket basshysy jastardy eldiń qoǵamdyq ómirine tartýdyń mańyzyna ərkez nazar aýdaryp keledi. Təýelsiz Qazaqstannyń jas urpaǵy bolashaq úshin qajet jaqsy qasıetterdi boılaryna sińirip ósýleri kerek.
Forým úsh baǵytta jumys istedi: kınematografııa, ekologııa, medısına. Shara aıasynda jastar ekologııa, medısına jəne kınoındýstrııa salalarynyń belgili tulǵalarymen ashyq alańda oı bólisip, óz keńistikterin ashyp, jastyq jigerlerin kórsetýge múmkindik beretin əleýetti tapsyrys berýshiler men ınvestorlarmen kezdesti.
