Parlament palatalary músheleriniń aldynda sóz sóılegen Qazaqstan Prezıdenti depýtattardyń ótken sessııadaǵy qyzmet nátıjelerine toqtalyp, elimizdegi reformalardy zańnamalyq turǵydan qamtamasyz etý jónindegi jumystardy jalǵastyrýdyń mańyzdylyǵyn atap ótti.
– О́tken sessııada Parlament 84 zań jobasyn qarastyryp, qabyldady. Sonyń ishinde «Qazaqstan Respýblıkasynyń Konstıtýsııasyna ózgerister men tolyqtyrýlar engizý týraly» zań da bar. Bir jylda sizderdiń bastamalaryńyzben 15 zań jobasy ázirlendi, – dedi Elbasy.
Nursultan Nazarbaev júrgizilgen saıası reformalardyń nátıjelerine nazar aýdaryp, búkil memlekettik apparat aldyna qoıylǵan mindetterdi iske asyrýda Parlament pen Úkimettiń jaýapkershiligi joǵary ekenin aıtty.
– Qazaqstan búginde strategııalyq mańyzy bar birqatar mindetti iske asyrýda. Parlament Úkimetpen birlesip, Ult josparyn, Joldaýdy jáne qoldanystaǵy baǵdarlamalardy oryndaý úshin barlyq sharalardy qabyldaýy qajet, – dedi Memleket basshysy.
Qazaqstan Prezıdenti qoǵamdy damytýdyń jekelegen baǵyttaryna toqtaldy. Elbasy rýhanı jańǵyrý jáne ekonomıkalyq ósimdi qamtamasyz etý jónindegi mindetterdiń oryndalýyna nazar aýdardy.
– Bıyl Parlamenttiń qaraýyna jańa Salyq kodeksiniń jobasy engiziledi. Biz salyq saıasatyn meılinshe jaqsartyp, bıznesti ashyq jumys jasaýǵa yntalandyrýǵa tıispiz. Arnaıy ekonomıkalyq jáne ındýstrııalyq aımaqtar boıynsha zańnamany jetildirý kerek. Sondaı-aq, bankterge tıimdi baqylaý júrgizý úshin Ulttyq bankke zańnamalyq turǵydan kóbirek múmkindik berý qajet, – dedi Nursultan Nazarbaev.
Sonymen birge, Memleket basshysy saqtandyrý júıesin damytý jáne dári-dármek aınalymyn tártipke keltirý, sondaı-aq elimizdiń aqparattyq qaýipsizdigin qamtamasyz etý men quqyq qorǵaý júıesin reformalaý máseleleriniń mańyzdylyǵyn atap ótti.
– Parlamenttiń jáne búkil elimizdiń aldynda kóp ári jaýapkershiligi zor jumys bar. Aýqymdy mindetter men sheshimder – bizdiń 2017 jylǵy jahandyq syn-qaterlerge jaýabymyz. Jańǵyrý barlyq kúshimizdi jumyldyrýdy qajet etedi. Jańa jaǵdaıda bıliktiń zań shyǵarý jáne atqarýshy tarmaqtary syndarly túrde yntymaqtasýǵa tıis, – dedi Qazaqstan Prezıdenti.
