Ýnıversıtet jańa oqý jylyn bıyl da tabysty bastady. Stýdentter qatary 3000 jas túlekpen tolyǵyp, joǵary oqý orny 1156 bilim grantyn jeńip aldy.
Stýdentter men oqytýshylardy jańa oqý jylymen quttyqtaǵan ýnıversıtet rektory Aqylbek Kúrishbaev oqý ornynyń ǵylymı-zertteý ýnıversıtetine transformasııalaý úrdisi bastalǵanyn, bul júzege asqan shaqta QazATÝ elimizdegi Nazarbaev ýnıversıteti tıptes ekinshi oqý orny bolatynyn atap ótti.
-Biz óz ýnıversıtetimizdi shyn júrekten jaqsy kóremiz, bir-birimizben aýyzbirshilikte, bir úıdiń balasyndaı ómir súremiz, shańyraǵymyzdyń abyroıyn asqaq ustaýǵa tyrysamyz. Osyndaı eńsesi bıik elde turatynymyzdy, osyndaı abyroıy asqaq oqý ornynda jumys istep, oqıtynymyzdy árqashan maqtan tutkamyz. Sondyqtan sizder de osy úrdisti jalǵastyryp, bizdiń otbasynyń múshelerine aınalasyzdar degen senimdemin, - dedi oqý ornynyń basshysy.
«Bizdiń ýnıversıtet – tamyryn tereńnen alatyn, tarıhy baı, osynaý tyń ólkesin ıgerý shaǵynda tuńǵysh qurylǵan eń baıyrǵy oqý orny. 60 jyl ishinde oqý orny qabyrǵasynan 65 myńnan astam túlek ushyp shyqty. Olardyń ishinde búginde elimizge, álemge tanymal talaı qoǵam qaıratkerleri, ǵalymdar, sportshylarymyz bar. QazATÝ – Qazaqstandaǵy eń iri agrarlyq jáne tehnıkalyq joǵary oqý oryndarynyń biri. Ýnıversıtetimizdiń eń basty qundylyǵy – sapaly bilim berý. Ol úshin bizde barlyq jaǵdaı jasalǵan. QazATÝ-da 9 fakýltet, 47 kafedra, 25 ǵylymı-zertteý ortalyǵy jumys istep, 94 ǵylym doktory, 12 PhD doktor, 350 ǵylym kandıdaty eńbek etedi. Ýnıversıtetimiz álemdegi 800 úzdik ýnıversıtet qataryna kiredi», - Aqylbek Kúrishbaev.
