Q. Toqaev Parlament palatalarynyń birlesken otyrysynda Prezıdent N. Nazarbaev depýtattarǵa alda turǵan asa mańyzdy aýqymdy mindetter týraly jan-jaqty túsindirgenin atap ótti. «Memleketimizdiń órkendeýi men halqymyzdyń ıgiligi jolynda depýtattyq korpýs Úkimetpen tyǵyz baılanysta jumys júrgizip, Elbasy belgilegen mindetterdi oryndaýda, zańnamalyq jaǵynan der kezinde jáne sapaly qamtamasyz etedi dep senemin», - dedi Senat Tóraǵasy.
Q.Toqaev jańadan saılanǵan depýtattardy quttyqtady jáne asa jaýapty qyzmetteriniń tabysty bolýyna tilektestigin bildire kelip, bul Prezıdenttiń, halyqtyń zor seniminiń kórinisi ekenin atap ótti.
Jańa senatorlar ant qabyldaǵannan keıin Palata turaqty komıtetterdiń jetekshileri men múshelerin saılady. Konstıtýsııalyq zańnama, sot júıesi jáne quqyq qorǵaý organdary komıtetine Georgıı Kım; Qarjy jáne bıýdjet komıtetine Olga Perepechına; Halyqaralyq qatynastar, qorǵanys jáne qaýipsizdik komıtetine Darıǵa Nazarbaeva; Ekonomıkalyq saıasat, ınnovasııalyq damý jáne kásipkerlik komıtetine Asqar Beısenbaev; Áleýmettik-mádenı damý jáne ǵylym komıtetine Birǵanym Áıtimova; Agrarlyq máseleler, tabıǵatty paıdalaný jáne aýyldyq aýmaqtardy damytý komıtetine Jeńis Nurǵalıev jetekshilik etetin boldy.
Jańa konstıtýsııalyq ókilettikterine sáıkes senatorlar alǵash ret Qazaqstan Respýblıkasyndaǵy Adam quqyqtary jónindegi ýákil qyzmetine Asqar Shákirovty saılady.
