Tórtinshi ret uıymdastyrylǵan baıraqty básekege álemniń 25 elinen 70-ten astam sportshy ózderiniń baqtaryn synaýda. Halyqaralyq týrnır Dúnıejúzilik toǵyzqumalaq federasııasy, Qazaqstan Respýblıkasy Mádenıet jáne sport mınıstrligi jáne Astana qalasy ákimdiginiń muryndyq bolýymen ótkizilip jatyr.
Jarystyń ashylý saltanatyna Dúnıejúzilik toǵyzqumalaq federasııasynyń prezıdenti Álıhan Báımenov, Qazaqstan Respýblıkasy Mádenıet jáne sport mınıstrligi Sport jáne deneshynyqtyrý isteri komıtetiniń tóraǵasy Elsııar Qanaǵatov qatysyp, toǵyzqumalaqshylarǵa sáttilik tiledi.
Álıhan Báımenovtiń aıtýynsha, elimizde toǵyzqumalaqpen aınalysatyndardyń qatary kún saıyn artyp keledi. «Toǵyzqumalaqtan Almatyda ótken tuńǵysh respýblıkalyq saıysqa tórt-aq adam qatyssa, búgingi kúni atalǵan sport túrimen aınalysatyndardyń sany 200 myńnan asqan. Sonyń ishinde toǵyz myńǵa jýyq sportshy toǵyzqumalaqpen kásibı túrde aınalysyp keledi», – dedi ol.
Sondaı-aq, toǵyzqumalaqpen aınalysatyn sheteldik sportshylardyń da qatary artyp keledi. Onyń dáleli retinde bıylǵy álem birinshiligine Avstrııa, Kamerýn, Polsha jáne Ýkraına elderiniń sportshylary tuńǵysh ret qatysyp jatsa, AQSh, Germanııa, Ulybrıtanııa, О́zbekstan, Qytaı, Qyrǵyzstan jáne taǵy basqa memlekettiń sportshylary toǵyzqumalaqtan álem chempıonatyna turaqty túrde qatysyp keledi.
Chempıonat erler jáne áıelder arasynda jeke-jeke klassıka, rapıd, blıs boıynsha ótýde. Sondaı-aq, bıyl álem chempıonatynyń tarıhynda alǵash ret juptyq komandalyq jarys ótkizilmek. Oǵan ár memleketten bir er jáne bir áıel adam qatysady.
Toǵyzqumalaqtan álem chempıonatynyń maqsaty – qazaqtyń ulttyq zııatkerlik oıynyn álemdik deńgeıde nasıhattaý, onyń buqaralyq sıpatyn arttyrý jáne osy sport túrindegi eń úzdik sportshylardy anyqtaý.
Aıta keteıik, toǵyzqumalaqtan tuńǵysh álem chempıonaty 2010 jyly elordada ótse, ekinshi chempıonat 2012 jyly Chehııanyń Pardýbıse qalasynda uıymdastyrylǵan. Al úshinshi álem birinshiligi 2015 jyly Almatyda ótken bolatyn. Álem chempıonaty 8 qyrkúıekke deıin jalǵasady.
Álı BITО́RE,
«Egemen Qazaqstan»
