Jıyndy ashqan Senat Tóraǵasy «Elimizdiń órkendeýi men halqymyzdyń ıgiligi jolynda depýtattyq korpýs Úkimetpen tyǵyz baılanysta jumys júrgizip, Elbasy belgilegen mindetterdi oryndaýda, zańnamalyq jaǵynan der kezinde jáne sapaly qamtamasyz etedi dep senemin», dedi.
Sodan keıin jańadan saılanǵan 16 depýtat pen Prezıdent taǵaıyndaǵan 4 depýtat ant berdi. О́z kezeginde Tóraǵa Q.Toqaev osy kezge deıin Parlament Senatynda 6 turaqty komıtet qalypty jaǵdaıda jumys istep kelgendigin jáne onyń sany men ataýyn ózgertpeı-aq, jumysty jalǵastyrý jóninde usynys bildirdi. «Qazaqstan Respýblıkasy Parlamentiniń komıtetteri men komıssııalary týraly» Qazaqstan Respýblıkasy Zańynyń 3-babyna jáne Qazaqstan Respýblıkasy Parlamenti Senaty Reglamentiniń 106-tarmaǵyna sáıkes, Senatta alty turaqty komıtet qurylatyn bolady. Alaıda, biz búginge deıingi komıtetterdiń tıisti deńgeıde jumys júrgizgenin eskere otyryp, olardyń sany men ataýyn ózgerissiz qaldyrsaq degen oıdamyz», – dedi Senat spıkeri.
Q.Toqaevtyń bul usynysy depýtattar tarapynan biraýyzdan maquldandy. Sóıtip, depýtattardyń ashyq daýysqa salý ádisi arqyly Konstıtýsııalyq zańnama, sot júıesi jáne quqyq qorǵaý organdary komıtetine Georgıı Kım, Qarjy jáne bıýdjet komıtetine Olga Perepechına, Halyqaralyq qatynastar, qorǵanys jáne qaýipsizdik komıtetine Darıǵa Nazarbaeva, Ekonomıkalyq saıasat, ınnovasııalyq damý jáne kásipkerlik komıtetine Asqar Beısenbaev, Áleýmettik-mádenı damý jáne ǵylym komıtetine Birǵanym Áıtimova, Agrarlyq máseleler, tabıǵatty paıdalaný jáne aýyldyq aýmaqtardy damytý komıtetine Jeńis Nurǵalıev jetekshilik etetin boldy.
Sondaı-aq, kún tártibinde qaralǵan máselelerdiń biri retinde jańa konstıtýsııalyq ókilettikterine sáıkes senatorlar alǵash ret Qazaqstan Respýblıkasyndaǵy Adam quqyqtary jónindegi ýákil qyzmetine Asqar Shákirovti saılady.
Nurlybek DOSYBAI,
«Egemen Qazaqstan»
Sýretti túsirgen
Erlan OMAR,
«Egemen Qazaqstan»
