Elbasy keshe Parlamentte sóılegen sózinde de, sot baqylaýyn keńeıtýge, advokatýranyń rólin jáne sottaǵy sóz jaryspalylyǵyn arttyrýǵa baılanysty problemalarǵa erekshe nazar aýdardy.
Sýdıalar korpýsy Memleket basshysy jarııalaǵan reformalardy tolyq qoldaıdy. Vedomstvoaralyq jumys toby aıasynda biz kúdiktilerdi sotqa deıin qamaýda ustaý merzimin 72 saǵattan 48 saǵatqa deıin qysqartý, barlyq jasyryn tergeý is-qımyldaryn sottyń sanksııalaýy sııaqty mańyzdy bastamalardy engizdik.
Germanııa, Estonııa, Ulybrıtanııa jáne Grýzııa tárizdi elderdiń ozyq sot tájirıbesin zerdelep, tyń is-qımyldarǵa ázirlenýdemiz.
Buǵan qosa, Ult Jospary sheńberinde Joǵarǵy Sottyń janynan qurylǵan Halyqaralyq keńestiń usynymdary óte mańyzdy. Keńes músheleri advokatýra ınstıtýtyn damytý sharalaryna qatysty ózderiniń oılaryn usynyp otyr.
Sot kadrlaryna qatysty da aýqymdy jumys júrgizilýde. Bes jylda keminde bir ret barlyq sýdıalardyń biliktiligi tekseriletin boldy. Sýdıalar Sot tóreligi akademııasynyń bazasynda ózderiniń bilimderin árdaıym arttyryp otyrady. Sot ádildigin júzege asyrýdyń búkil prosesi aqparattyq júıege tirkeldi. Munyń bári zań ústemdigin is júzinde qamtamasyz etýge beıimdelgen zamanaýı jańalyqtar dep aıtýǵa laıyq.
Elbasy jarııalaǵan búgingi reformalarda óte ózekti jáne de azamattardyń konstıtýsııalyq quqyqtarynyń qorǵalý kepilin odan ári kúsheıtetin bolady.
Prezıdent elimizdi Ekonomıkalyq yntymaqtastyq jáne damý uıymy (EYDU) elderiniń eń ozyq halyqaralyq standarttaryna jeteleıtin aıqyn ári naqty tetikterdi belgilep berdi.
Qaırat MÁMI,
Joǵarǵy sot tóraǵasy
