Qazirde óńirde bıznesti qoldaý qarqyn alyp keledi. Osy maqsatta Taraz metallýrgııalyq zaýyty bazasynda ındýstrııalyq aımaq ashyldy. Indýstrııalyq aımaqtyń basty maqsaty – óz bıznesin damytýǵa nıet etken kásipkerlerge barynsha qolaıly jaǵdaı jasaı otyryp, shyǵyndarynyń az bolýyn da qamtamasyz etý. Sondaı-aq, oblysta jańa jumys oryndarynyń ashylýyna sebepshi bolyp, tehnologııalyq jáne básekege qabiletti óndiristiń damýyna óz septigin tıgizedi. Bul da elimizde qolǵa alynyp otyrǵan ındýstrııalandyrý isiniń ıgiligin kórsetedi. Al jańa ashylyp otyrǵan ındýstrııalyq aımaqtyń basty ereksheligi qandaı jáne onyń mindeti ne bolmaq? Sondaı-aq, mamandar úshin qanshalyqty jaǵdaı jasalǵan?
Shet memleketter men ózge oblystardan ınves-tısııalar tartý, ónerkásip salasyndaǵy óńiraralyq, memleketaralyq damý jáne ónerkásiptik uıym qyzmetkerleriniń biliktiligin arttyrý atalǵan aımaqtyń mańyzdy mindeti bolmaq. Indýstrııalyq alań daıyn óndiristik ınfraqurylymǵa ıe bolǵandyqtan, ónerkásiptik nysandardyń jumysyn qoldaýǵa múmkindik beredi. Munda 63 myń sharshy metrden astam óndiristik, ákimshilik jáne qoımalyq ǵımarattary bar aımaq jylýmen, gazben jáne sýmen jabdyqtalǵan, elektr energııasymen qamtamasyz etilgen. Kásiporynnyń negizgi tehnologııalyq sehtaryna kirýge múmkindigi bar temir joldar jumys istep tur. Sondaı-aq, avtomobıl magıstraline erkin qol jetkizý de qıyndyq týdyrmaıdy. Internet jáne baılanys qyzmetteri joǵary qarqynda jumys istese, medısınalyq járdem berý jáne qoǵamdyq tamaqtandyrý qyzmetteri qoljetimdi, deıdi Jambyl oblysy ákiminiń orynbasary Tımýr Janke.
Taraz metallýrgııalyq zaýyty ınfraqurylymynyń jalpy qýaty saǵatyna 500 mVt astam elektr energııasyn tutynatyn jabdyqtaryna qyzmet kórsetýge qaýqarly. Indýstrııalyq aımaq Taraz qalasynyń ónerkásiptik bóliginde ornalasqan. Atalǵan aımaqqa zaýyttan arnaıy óndiristik jáne ákimshilik ǵımarattar men qoımalar ornalasqan 41 gektar alań bólingen. Budan basqa aımaqta zaýyttaǵy qurylys-montaj, metall qurastyrý jáne montajdaý, temirdi óńdeý, mehanıkalyq óńdeý, sondaı-aq, arnaıy tehnıkalarmen jabdyqtalǵan avtopark bar. Sonymen qatar, ındýstrııalyq parktiń damýyna oraı shaǵyn jáne orta bıznes kásiporyndarymen yntymaqtastyq jóninde baǵdarlama da iske qosylǵan. Jýyq arada bıznes-ınkýbatordy iske qosý josparlanyp otyr. Endi atalmysh jobaǵa alańy 7000 sharshy metrden astam ǵımarat beriletin bolady.
Hamıt ESAMAN,
«Egemen Qazaqstan»
Jambyl oblysy
