Tabıǵattyń tolysyp, mıýanyń, baqshanyń pisken kezi qalanyń kórkin ǵana keltirip ǵana qoımaıdy, molshylyqty da, baılyqty da pash etkendeı bolady. Qostanaı toıy aınala baý-baqtarda ósetin kókónisterdiń, gúlderdiń, jemisterdiń kórmesinsiz ótken emes. Bul joly da baý-baqsha kórmesi merekege jınalǵandarǵa qýanysh syılady, saıabaq ustaıtyndardyń mereıin ósirdi, mereke kórkin asyra tústi. Qazaqstannyń soltústigi demeseńiz, Qostanaıda da tabaǵa shyjǵyrǵandaı ystyqtar bolyp turady. Qala toıy kúni bolǵan ystyqty da qostanaılyqtar jazymen kútken eken. Al soltústiktiń jańbyrly, shybynsyz jaz bolyp turatyn aýa raıyna beıimdelgen jemis-jıdek –Tobyl óńiriniń bir baılyǵy. Qala kúninde ótken «Altyn alma-2017» festıvali osy oıymyzdyń aıǵaǵyndaı boldy. Árıne, qostanaılyq sorttar Almatynyń aportymen talasa almas, degenmen dámi til úıiredi.
– Almasyz Qostanaı jazyn qalaı elestete alasyń? Almanyń sortyn eshkim túgeldep sanap bere almaıtyn shyǵar, óte keń jaıylǵan jemis ǵoı. Qostanaıda almanyń «ýralochka» sorty óspeıtin baý joq deýge bolady. Almanyń bul túri kúzge qaraı pisedi, jeseń de tátti, qysqa saqtaý úshin túrlishe óńdeýge de bolady, tosap qaınatasyń da, kompot jabasyń ba, keptiresiń be – bárine de qolaıly. Qostanaılyq baqshashylar alma túrlerin shelektep ákelipti, qandaı sulýlyq deseńshi!–dep tańdanysyn jasyra almady Qostanaı qalasynyń turǵyny Meńzada Qalmaǵambetqyzy.
Jyl saıyn qala merekesinde kolleksııa jınaýshylardyń kórmesin uıymdastyrý dástúri bar. Bıyl kezek samaýryn, útik jınaýshylarǵa tıipti. Altynaı Amanovanyń úıinde basqaǵa bolmasa da samaýrynǵa oryn tabylady. Ol turmysqa shyqqanda enshisine bergen samaýryndy kútip ustady. Odan keıin anasy bir samaýryn, dostary da bir samaýryn syılady. Osydan keıin ózi samaýryn jınaýdy ádetke aınaldyrdy. Dúkende, bireýdiń úıinde samaýryn kórse aınalshyqtap shyǵa almaıtyn. Qazir Amanovtardyń úıinde mys samaýrynnan bastap sývenır samaýrynǵa deıin osy buıymnyń júzge tarta túri bar. Ony qala merekesinde qyzyqtaǵandar da kóp boldy.
Kúnniń ystyǵyna qaramastan qala merekesiniń qyzyǵy kúni boıy tolastamady. Mereke sheńberinde ótken kishkentaı búldirshinderdiń «Kishkentaı mıss» baıqaýy da rýhanı azyq syılady. Qyz balanyń tárbıesin pash etken baıqaýǵa 7 men 9 jas aralyǵyndaǵy 7 qyz bala qatysty.
– Baıqaý maqsaty – júldeli oryndarǵa talasý emes, merekege jınalǵandarǵa, ásirese ata-analarǵa qýanysh syılaý edi. Qala kúni sheńberindegi bul baıqaýdy biz ár balanyń balalyq shaqtyń baqytyn sezinýine aınaldyrýdy jón kórdik. Sondyqtan bul baıqaýda júldeli oryndar bolmaıdy, atalym boıynsha barlyq qatysýshy búldirshinderge oıynshyqtar men kitaptar syıladyq,–deıdi «Mıras» mádenıet úıiniń dırektory Svetlana Petrova.
«Kishkentaı mıss» baıqaýyna ata-analarmen qatar qyzdar oqıtyn mektepter de atsalysty. О́nerimen sahna sánine aınalǵan kishkentaı qatysýshylar Aqbaıan Jumash, Dıana Kıchkaılo, Vıktorııa Morshakova, Zara Altynbaeva, Amıra Jarasbaı, Darıa Shevchenko, Anastasııa Ivanova baıqaýdy naǵyz merekege aınaldyrdy.
Merekeniń sáni qashanda án men kúı emes pe? Kúni boıy qala ortalyǵyndaǵy sahnada «Karnaval» bı ansambli, djaz-bend, oblystyq fılarmonııanyń ártisteri men kórkemónerpazdar ujymdary, «Altyn mıkrofon» balalar respýblıkalyq baıqaýynyń qostanaılyq júldegerleri óner kórigin qyzdyrdy. Mereke sheńberinde Kavkaz halyqtary mádenıetiniń festıvali ótken bolatyn. Oǵan elimizdiń túrli qalalarynan kelgen ónerpazdar qatysty. Taý halqynyń delebeni qozdyratyn bıi mereke qyzyǵyn ústemeleı tústi.
– Biz Kavkaz halyqtarynyń óner festıvalin qatarynan bes jyl boıy ótkizip kelemiz. Bıyl ony Qostanaı qalasynyń merekesine oraılastyrdyq. Taý halyqtarynyń bıi kimge de bolsa unaıdy,–deıdi Dostyq úıiniń baspasóz hatshysy Zúlfııa Nabıeva.
Mereke sport jarystarynsyz da bolǵan joq. Mashınany tartý, qoı kóterip turyp, júresinen jattyǵýlar jasaý sekildi halyqtyq oıyndar da jurtty qyzyqqa bóledi. Merekede balalar salǵan sýret baqytty eldiń tynysh, molshylyq ómirinen habar bergendeı bolady.
Oblys ákimi Arhımed Muhambetov qostanaılyqtar men qala qonaqtaryn merekemen quttyqtady. Ákim sózinde Qostanaı qalasynyń jyl saıyn ósip, órkendep, gúldenip kele jatqanyn tilge tıek etti. Ol týǵan jerdi gúldendirýge eńbegi sińgen qostanaılyqtar: memlekettik qyzmet ardagerleri Sabyrjan Ahmetovke, Vera Semenovaǵa, Qazaqstannyń halyq aqyny Ásııa Berkenovaǵa, sharýashylyq uıymdastyrýshy О́mirzaq Ihtılıapovke «Qostanaı oblysynyń qurmetti azamaty» tósbelgisin tabys etti. Sonymen qatar zańger Tursynbaı Jarmuhamedov, sport ardageri Oljabaı Sársenbaev, kásipker Sergeı Sotnıkov «Qostanaı qalasynyń qurmetti azamaty» atandy.
Elimizdiń astyq derjavasy Qostanaı oblysynyń basty qalasy – Qostanaıdyń merekesi táýelsiz elimizdiń órkendeýin pash etti.
Názıra JÁRIMBET,
«Egemen Qazaqstan»
QOSTANAI
Sýretterdi túsirgen
Nıkolaı SOLOVEV
