Investısııalar jáne damý mınıstri Jeńis Qasymbek aldaǵy jylytý maýsymyna daıyndyq maqsatynda 2017-2018 jyldarǵa arnalǵan jumystar jospary bekitilgenin aıtyp ótti. Oǵan sáıkes 15 qazanǵa qaraı barlyq nysandardy, sonyń ishinde derbes qazandyqtar men ınjenerlik jelilerdi daıyndaý jumystary tolyǵymen aıaqtalady, sondaı-aq, búkil derbes jylý kózderi otynnyń normatıvtik qorymen qamtamasyz etiledi.
Qazirgi tańda bilim berýdiń 11 139 nysany – jospar boıynsha 100% jóndelgen. Densaýlyq saqtaý nysandary boıynsha 6 445 nysandy jóndeý kózdelgen bolatyn, olardyń búginde 98%-y daıyn. Jóndeý jumystaryn júrgizý josparlanǵan 43 572 turǵyn úıdiń 88,2%-y daıyn.
Jylý kózderi týraly aıtar bolsaq, jergilikti atqarýshy organdar 10 326 derbes qazandyqty jóndeýdi josparlaǵan, olardyń 94,3%-y ázir. Qazirgi kezeńge josparlanǵan 2 113 shaqyrym jylý jelisiniń 2 000 shaqyrymy jóndelgen. Búgingi tańda Almaty, Atyraý jáne Soltústik Qazaqstan oblystarynyń jylý jelileri shamamen 85%-ǵa daıyn. Sýmen jabdyqtaý jelilerin ázirleý aıasynda, jospardaǵy 2 040 shaqyrymnyń 87,6%-yna jóndeý jumystary júrgizilgen.
Otyn ázirleý máselesi boıynsha, derbes qazandyqtardyń otynǵa degen qajettiligi aldaǵy maýsymda 1 227 myń tonna kómir men 122 myń tonna mazýtty quraıdy. Búgingi tańda 1 070 myń tonna kómir (87,2%) jáne 63,6 myń tonna mazýt (52%) óndirilgen.
Bilim jáne ǵylym mınıstri Erlan Saǵadıev bilim jáne ǵylym mınıstrligi jergilikti atqarýshy organdarmen birlesip, bilim berý nysandarynyń aldaǵy jylytý maýsymyna daıyndyq jumystaryna monıtorıng júrgizip jatqanyn málimdedi.
Oblystardyń jáne Astana men Almaty qalalarynyń ákimdikteriniń aqparaty boıynsha jylytý maýsymyna 2 617 memlekettik balalar baqshasy, 7 094 memlekettik jalpy bilim beretin mektep, 473 kolledj jáne 130 joǵarǵy oqý orny daıyn. Bilim berý nysandary jylytý maýsymyna ázirlik boıynsha aktterdi aldy.
densaýlyq saqtaý mınıstri Eljan Birtanov 2017-2018 jyldarǵa arnalǵan jylytý maýsymyna daıyndyq jumystary kommýnaldyq qyzmettermen bekitilgen kestelerge sáıkes júrgizilip jatqanyn aıtty. Barlyq óńirlerde densaýlyq saqtaý uıymdaryn jylytý maýsymyna daıyndaý jumystary júrgizilip jatyr .
Respýblıkada densaýlyq saqtaýdyń 5 774 nysany (arendalyq jáne jekemenshik nysandardy esepke almaǵanda) jumys isteıdi, olardyń: 822-si ortalyqtan jylytylady, 312-si elektrmen, 3 815-si qatty ári suıyq otynmen jáne 825-i gaz jabdyǵymen jylytylady.
Jóndeý jáne daıarlaý jumystary, otyn satyp alý jáne jetkizý jumystary bekitilgen josparǵa sáıkes júrgizilip jatyr. Respýblıkalyq mańyzy bar 41 nysan boıynsha jylytý maýsymyna ortasha daıyndyq 98%-dy quraıdy, 37 nysan ázirlik aktisin aldy, 4 nysanda jumys jalǵastyrylyp jatyr jáne ony 30 qyrkúıekke deıin aıaqtaý kózdelgen.
Jergilikti mańyzy bar 5 733 nysan boıynsha JAO málimetine sáıkes, jylytý maýsymyna daıyndyq orta eseppen 92%-dy quraıdy. Sonymen qatar 11 óńirde jumystar 90% jáne odan joǵary paıyzǵa oryndalǵan. Sondaı-aq, QR Úkimetiniń otyrysy kezinde Aqmola oblysynyń ákimi Málik Myrzalın, Pavlodar oblysynyń ákimi Bolat Baqaýov, SQO ákimi Qumar Aqsaqalov, OQO ákimi Janseıit Túımebaev, Qostanaı oblysynyń ákimi Arhımed Muhambetov, Astana ákimi Áset Isekeshev, Almaty ákimi Baýyrjan Baıbek jáne Qaraǵandy oblysy ákiminiń orynbasary Anatolıı Shkarýpa sóz sóıledi.
Premer-Mınıstr Baqytjan Saǵyntaev jylytý maýsymyna daıyndyq jumystaryn turaqty baqylaýda ustaýdy, sonymen qatar óńirlerge otyn satyp alýǵa bólingen qarajattar týraly derekterdi jınaqtaýdy tapsyrdy. Atalǵan jumysqa jaýapkershilik QR Premer-Mınıstriniń birinshi orynbasary Asqar Mamınge júkteldi.
