«E» tobyndaǵy bul kezdesý ótpes buryn, Polsha quramasyn ókshelep kele jatqan Danııa fýtbolshylary syrt alańda Armenııany 4:1 esebimen oısyrata utqan bolatyn. Ol azdaı-aq, Chernogorııa quramasy da Rýmynııa fýtbolshylarynan 1:0 esebimen basym túsip, toptaǵy jaǵdaıdy tipti kúrdelendirip jiberdi. Sol sebepti, polıaktar qazaq fýtbolshylarymen bolǵan kezdesýge shıryǵyp shyqty.
Shynyn aıtqanda, Adam Navalkanyń shákirtteri bizdiń oıynshylarǵa qaraǵanda sergek hám shıraq kórindi. Jyldam da dál pastarmen adymdy ashtyrmaı, dińkeletýge tyrysty. Machtyń 11-mınýtynda Grosıskıdiń sol qanattan áýelete bergen pasyn Makýshevskı baspen uryp, aıyp alańynyń orta tusynda turǵan Mılıkke baǵyttady. Al Mılık bolsa múlt ketpedi. Esep – 1:0.
Qaqpasyna gol soǵylǵannan keıin bizdiń fýtbolshylardyń namysqa tyrysyp, alǵa umtylǵany ras. Sondaı sáttiń birinde, ıaǵnı oıynnyń 48-mınýtynda Roman Murtazaevtyń soqqysynan keıin dop qaqpa ishinen tabylǵan. Biraq, match tóreshisi Andrıs Treımanıs bul goldy esepteýden bas tartty. Onyń pikirinshe, dál sol sátte Islambek Qýat alań ıeleriniń qaqpashysyn denesimen jaýyp, oǵan qarsy oıyn tártibin buzǵan eken.
Budan keıin latvııalyq tóreshiler Robert Levandovskıdiń standartty jaǵdaıdan teýip qaqpaǵa engizgen tap-taza golyn sanamaı tastady. Osy jaǵdaı ashýyna tıgen bolý kerek, polıaktar ile-shala taǵy bir shabýyl uıymdastyryp, Kamıl Glıktiń kómegimen esepti eseleı tústi. Bul gol oıynnyń 74-mınýtynda soǵylǵan edi.
Kezdesýdiń bitýine bes mınýt ýaqyt qalǵanda ylǵı shabýyldyń ótinde júretin Levandovskı bizdiń qaqpanyń aldyn taǵy da shań qyldy. Robertti quryqtaý kimge ońaı tısin, bizdiń qorǵaýshylar amaldyń joqtyǵynan oǵan qarsy tártip buzdy. Penaltıdi sátti oryndaǵan surmergen bul oıyndaǵy nátıjeniń sońǵy núktesin ózi qoıdy.
Obaly neshik, bizdiń quramanyń oıynshylary bul kezdesýde aıanyp qalmady. Shama-sharqy jetkeninshe aıqasyp baqty. Biraq, shabýyldyń sheshýshi sátterindegi sharasyzdyq pen qorǵanystaǵy sasqalaqtaǵan senimsiz oıyn komandanyń jigerin qum etti.
Oıynnan keıin bolǵan baspasóz máslıhatynda bas bapker Aleksandr Borodıýk bylaı dedi: «Eger, esepti teńestirgenimizde, oıyn basqasha órbıtin edi. Jalpy, biz polıaktar sııaqty dopty jyldam ıgeretin qarsylastarmen, sonymen qatar 50 myńnan astam kórermeni gýildep turatyn stadıonda oınap úırenýimiz kerek. Polsha men Chernogorııada ár úsh kún saıyn tolyq oınasa da kúshin op-ońaı jınap ala qoıatyn oıynshylar bar. Mine, bizge jetpeıtini osy».
Kelesi oıyndy Qazaqstan fýtbolshylary 5 qazan kúni Rýmynııada sol eldiń qurama komandasymen ótkizedi.
Qaırat ÁBILDA,
«Egemen Qazaqstan»
