Maqala avtory áýeli Qazaqstan jóninde jan-jaqty aqparat bere kele, latyn álipbıine kóshý máselesi qalaı týyndaǵanyna toqtalady. Onyń pikirinshe, jańa qaripke kóshý Qazaqstannyń saıası baǵytynyń bir quraly.
«Ortalyq Azııa memleketterinde orys tili ortaq qatynas quraly retinde qalyptassa da, jańa myńjyldyqta olardyń birazy latyn álipbıine aýysa bastady. Nazarbaevtyń on jyldaı buryn jańa álipbıge kóshý jóninde aıtqan pikiri Qazaqstanda qyzý talqyǵa tústi. Qazaqtardyń kóshbasshysy saıası, ekonomıkalyq jáne mádenı jaǵdaılar bir araǵa toǵysqanda mundaı qadamǵa baratyny jóninde málimdegen-di. Sáýirde N.Nazarbaev álipbıdi aýystyrý jónindegi usynysyn «Egemen Qazaqstan» gazetinde jarııalady», – deıdi Daily Sabah.
Basylymnyń jazǵanyna súıensek, jańa álipbıge kóshý qazaqı jańa bolmystyń mádenı jáne áleýmettik qajettilikterin qamtamasyz etedi.
«Nazarbaev 2025 jylǵa qaraı latyn álipbıin búkil resmı qujattarda, kitaptarda, basylym betterinde, medıa jáne basqa salalarda qoldanýǵa pármen etti. Qazaqstan bıligi osy jyldyń sońyna taman 42 áriptik kırıll álipbıin latynǵa aýystyrý reformasyna kirisedi. El bıligi 1940 jyly kırıll qarpine kóshý qazaq ultynyń bolmysyna syna qaqty dep esepteıdi. Sondyqtan, qoldanystaǵy álipbıden bas tartý qazaqı jańa bolmystyń mádenı jáne áleýmettik qajettilikterine saı keledi», dep habarlaıdy maqala avtory.
Daily Sabah Elbasy N.Nazarbaevtyń latyn qarpine kóshý jónindegi sheshimin Mustafa Kemal Atatúriktiń áreketimen salystyrady. «Túrikterdiń atasy» Túrkııa Respýblıkasy qurylǵanda eldegi álipbıdi latynǵa kóshirý jóninde qarar qabyldaǵany tarıhtan málim. Odan ári maqalada latyn álipbıiniń túrki halyqtaryna áseri jóninde órbigen. Daily Sabah N.Nazarbaevty túrki álemindegi dana kósem retinde sıpattaı kele, ony «Kóshpelilerdiń urpaqtaryn» biriktirýge kúsh salǵanyn aıtady.
«Nazarbaev «Túrki tildi memleketter sammıti» sekildi túrki elderiniń birneshe kezdesýine bastama jasady. Bastapqyda sammıt qalaǵan nátıjege qol jetkizbese de, 2009 jyly Túrki keńesiniń qurylýyna uıytqy boldy. Qazaqstan, Ázerbaıjan, Qyrǵyzstan jáne Túrkııa bastamasymen qurylǵan Keńes túrki halyqtarynyń sımvolyna aınaldy. Saıası jáne ekonomıkalyq uıymnyń ornyna, Túrki keńesine múshe elder arasynda mádenı, bilim jáne baılanysty nyǵaıtýǵa kúsh salynady», – dep málimdeıdi Daily Sabah.
Basylymnyń pikirinshe, Qazaqstannyń latyn álipbıine kóshý jónindegi sheshimi Túrki keńesiniń qyzmetine saı keledi.
«Qazaqstannyń Ortalyq Azııadaǵy mańyzyn, túrki tilderin resmı jáne beıresmı túrde latyn qarpine aýystyrý «Túrki jahandanýy» dep atalatyn úderisti bastaıdy. Bul termın túrki halyqtaryna ortaq til qalyptastyryp, túrli álipbı kedergisin joıýǵa kómektesedi.
