– Búgin biz Qazaqstan-Polsha bıznes-forýmyna qatysamyz. Byltyrǵy tamyzda Polshaǵa jasaǵan saparymdy jyly sezimmen eske alamyn. Mundaı baılanystar eki eldiń yntymaqtasýǵa degen nıetiniń zor ekenin bildiredi, – dedi Qazaqstan Prezıdenti.
Sonymen birge, Nursultan Nazarbaev memleketterimiz arasyndaǵy ekijaqty ózara is-qımyldy keńeıtý úshin eshqandaı kedergi joq ekenin atap ótti.
– Qazaqstan polıak bıznesmenderi úshin ashyq. Sizdiń ótinishińizben elderimizdiń astanalary arasynda tikeleı áýe reısi ornady. Osy áýe qatynasyna eki memleket turǵyndarynyń suranysy joǵary ekenin jáne bul halyqtarymyzdyń tyǵyz baılanystar ornatýǵa múddeliligin bildiretinin atap ótken jón, – dedi Memleket basshysy.
Polsha Prezıdenti Qazaqstanǵa shaqyrǵany úshin Nursultan Nazarbaevqa rızashylyǵyn bildirip, Qazaqstan-Polsha bıznes-forýmynyń jumysyna birlese qatysýdyń mańyzdy ekenin aıtty.
– Men bizdiń kezdesýlerimizdiń bárin zor qýanyshpen eske alamyn. Sizdiń Polshaǵa byltyrǵy saparyńyz elderimizdiń ekonomıkalyq yntymaqtastyǵyn damytýǵa zor úles qosty. Sizdiń saparyńyz osy baǵytta júrgizilip jatqan jumystarǵa tyń serpin bergenin erekshe atap ótkim keledi. Polshadan Qazaqstanǵa jetkiziletin taýar kólemi 50%-ǵa, al Qazaqstannyń Polshaǵa joldaıtyn taýary 80%-ǵa artty. Osylaısha, Sizdiń bizge kelgen saparyńyzdyń nátıjesi aıqyn kórinýde. Men soǵan qýanyshtymyn, – dedi A.Dýda.
