Saltanatty jıyndy quttyqtaý sózben ashqan Qazaqstannyń Investısııalar jáne damý vıse-mınıstri Tımýr Toqtabaev Birikken Arab Ámirlikteriniń qatysýy úlken mańyzǵa ıe ekenin jetkizdi. Onyń aıtýynsha, sońǵy jyldary eki el basshylarynyń erik-jigeriniń arqasynda saýda-ekonomıkalyq baǵytttaǵy ózara yntymaqtastyq qarqyndy damyǵan. Sonyń bir dáleli– Qazaqstan Prezıdenti Nursultan Nazarbaevtyń bıylǵy qańtar aıynda Birikken Arab Ámirlikterine jasaǵan resmı sapary.
Búginde saýda salasynda BAE arab túbegindegi elder arasynda birinshi orynǵa shyǵyp, byltyr taýar aınalymy 3,5 esege artyp, 380 mln AQSh dollaryn qurapty. Investısııa salasynda da turaqty ósim baıqalyp, sońǵy 12 jylda Birikken Arab Ámirlikteriniń elimizge salǵan tikeleı ınvestısııalarynyń kólemi 2 mlrd AQSh dollaryna jetken. Al Qazaqstannan BAÁ ekonomıkasyna quıylǵan ınvestısııalardyń kólemi shamamen 1 mlrd dollardy quraıdy. Qazirgi kúni elimizde Ámirlik kapıtalynyń qatysýymen 190-nan astam birlesken kásiporyn jumys isteıdi.
Sondaı-aq, vıse-mınıstr «Astana» halyqaralyq qarjy ortalyǵyn qurý barysynda Dýbaıdyń dál osyndaı ortalyǵyn ashý tájirıbesi aıtarlyqtaı septigin tıgizgenin atap ótti. «Endi «Astana» qarjy ortalyǵy ınvestorlarǵa jańa múmkindikter ashady, BAE azamattarynyń vızasyz rejımi de barlyq saladaǵy yntymaqtastyqty damytýǵa yqpal eteri sózsiz», deıdi T.Toqtabaev.
Al Birikken Arab Ámirlikteri Ulttyq medıa keńsesiniń bas dırektory Mansýr ál-Mansýrı búgingi ulttyq kún – eki el arasyndaǵy 25 jyl boıy jalǵasyp kele jatqan áriptestik pen yntymaqtastyqty bildiretin erekshe mereke ekenin atap ótti.
–Astanadaǵy EKSPO kórmesi energııanyń ekologııalyq taza túrlerin paıdalaný álem ekonomıkasy úshin asa mańyzdy ekenin taǵy bir dáleldedi. Jahandyq kórmeniń taqyryby Birikken Arab Ámirlikteriniń taza energııany paıdalaný strategııasyna tolyǵymen sáıkes keledi, deıdi ol.
Júrekjardy lebizderden keıin osy eldiń salt-dástúrin aıshyqtaıtyn áýender shyrqalyp, ulttyq bıleri kórermen qaýymǵa usynyldy.
Jalpy Ámirlikter – arab memleketteri arasynan «Astana EKSPO-2017» kórmesine qatysatynyn resmı túrde rastaǵan alǵashqy memleket. Olardyń elordada tikken pavılony da kórme alańyndaǵy eń irilerdiń biri. Kórme jumysy bastalǵaly pavılonǵa 500 myńnan astam adam kelipti. Munda balamaly energııa kózderin óndiretin eń ozyq tehnologııalar qoıylǵan. Buǵan qosa, ár kelýshi 2020 jyly Dýbaıda ótetin EKSPO kórmesine jáne Mars ǵalamsharyna vırtýaldy túrde saıahat jasaı alady. «2020 jyly biz de osyndaı iri jahandyq sharany qolǵa alǵaly otyrmyz. Oǵan kemi 25 mln adam keledi degen úmitimiz bar. 2020 jyldyń 20 qazanynan 2021 jyldyń 10 sáýiri aralyǵynda ótetin halyqaralyq kórmege daıyndyq qazirden bastalyp ketti. Al Astana kórmesi sol aıtýly sharaǵa degen tájirıbemizdi shyńdaı tústi», deıdi Ámirlik ókilderi.
Qymbat Toqtamurat,
«Egemen Qazaqstan»
