Jıynǵa Islam-Kýk anderkartynda kezdesý ótkizetin barlyq qazaqstandyq boksshylar men olardyń qarsylastary qatysty. Sondaı-aq, Brendon Kýk pen onyń jattyqtyrýshysy Maık Gaıet, promoýteri Taıler Brakston da keldi.
Qazaqstanda ekinshi ret jekpe-jek ótkizeıin dep jatqan Qanat Islam aldaǵy kezdesýge daıyn ekenin aıtty. «Elordada tuńǵysh ret kezdesý ótkizbekpin. 9-shy qyrkúıek kúni sharshy alańǵa shyǵatyn boksshylardyń barlyǵy táýelsiz eldiń er-azamattary. Maqsatymyz - elge jeńis syılaý, qazaq boksshylarynyń myqty ekenin búkil álemge tanytý», dedi ol.
Al kanadalyq boksshy Brendon Kýk Qazaqstanǵa tek jeńis úshin kelgenin aıtady. Ol ózge elde alǵash ret jekpe-jek ótkizeıin dep jatsa da, bul jeńiske jetýime esh kedergi keltirmeıdi deıdi. «Men negizi Qazaqstanǵa josparlanǵan ýaqyttan úsh kún erte kelip aldym. Ýaqyttyq beldeýge, aýa raıyna tez úırenisip kettim. Qanattyń jekpe-jekterin qarap shyqtym. Biraq, qazir sizderge ol týraly eshteńe aıta almaımyn. Bárin sharshy alań kórsetedi. Bul meniń syrt eldegi alǵashqy kezdesýim. Men elderińizge tek jeńis úshin keldim», deıdi Kýk.
Aıta keteıik, Qanat Islam men Brendon Kýk arasyndaǵy jekpe-jek 9-shy qyrkúıek kúni astanadaǵy «Saryarqa» velotreginde ótedi. Sondaı-aq, bul keshte Qanattan basqa segiz boksshymyz judyryqtasady. Olar: Meıirim Nursultanov, Janhosh Turarov, Jánibek Álimhanuly, Aıdos Erbosynuly, Álı Ahmedov, Dımash Nııazov, Rýslan Myrsataev jáne Nursultan Jańabaev.
