N. Nyǵmatýlın sessııanyń ashylýynda kún tártibindegi máselelerge kirispes buryn depýtattyq korpýstyń nazaryn Qazaqstan Prezıdenti belgilegen tapsyrmalarǵa aýdardy.
«Aıtylǵan mindetterdiń bárin júzege asyrý úshin jáne Memleket basshysynyń strategııalyq baǵytyn zańnamalyq qoldaýdy qamtamasyz etýde bizge úkimetten usynylǵan, sonymen qatar depýtattardyń bastamasymen ázirlenetin zań jobalarymen jumysty júıeli jáne sapaly túrde jalǵastyrýymyz kerek», – dedi N.Nyǵmatýlın.
Májilis tóraǵasynyń sózine súıensek, Palataǵa kelip túsken kedendik retteý jónindegi Kodeks jobasy qaralǵanda Elbasynyń tapsyrmalary basshylyqqa alynýy tıis. Spıker Úkimetten túsetin salyq jáne basqa da mindetti tólemder boıynsha Kodeks jobasymen jumys istegende sondaı ádisti basshylyqqa alý kerek ekenin málimdedi. N.Nyǵmatýlın depýtattar zań jobalaryn talqylaǵanda ádettegideı ashyq alań uıymdastyratynyna senimin bildirdi.
Palata Tóraǵasy Májiliske engizilgen birqatar zańdyq qujattarǵa toqtaldy. Onyń ishinde «2018-2020 jyldarǵa arnalǵan respýblıkalyq bıýdjet týraly» jáne «Qazaqstan Respýblıkasynyń Ulttyq qorynan 2018 - 2020 jyldarǵa arnalǵan kepildendirilgen transfert týraly» negizgi qarjy qujattary, bıýdjettik zańnamany jetildirýge qatysty, sondaı-aq, «Qazaqstan Respýblıkasyndaǵy kedendik retteý týraly» Kodeksiniń jobasy men ilespe túzetýleri bar.
Abaı Asankeldiuly,
«Egemen Qazaqstan»
