«Bilim jáne ǵylym mınıstrliginiń jaýapty qyzmetkerleri osy jyly «Altyn belgi» ıegerleriniń basymdyq quqyǵy bolmaıdy, bilim granty tek Ulttyq birińǵaı testileýden joǵary ball alǵan talapkerlerge beriledi dep málimdegen. Al shyn máninde bilim granttary qoldanystaǵy «Bilim týraly» Zań men bilim grantyn berý erejesine sáıkes, «Altyn belgi» ıegerleriniń basymdyq quqyǵyn saqtaı otyryp bólindi. Osy qarama-qaıshylyq talapkerler men ata-analardyń túsinbeýshiligin týǵyzdy», – degen Á.Bekturǵanov Bilim jáne ǵylym mınıstrliginiń bilim granty ıegerleriniń tizimin eki ret jarııalaýy árkimniń qalaýyna keltiretin emes, zań boıynsha sheshiletin másele ekenin málimdedi.
Osy máselege qatysty Á.Bekturǵanov Premer-mınıstrdiń orynbasary Erbolat Dosaevqa birneshe saýal joldady. Áýeli Bilim jáne ǵylym mınıstrliginiń nelikten zań jobasyna silteme jasap, sheshimin ózgertkeni suralsa, ekinshi mınıstrliktiń qandaı qujatqa ıek artyp sheshim shyǵarylǵany jóninde suraq qoıyldy. Sonymen qatar, depýtat birinshi tizimde grant taǵaıyndalyp, ekinshi tizimde grantqa ilinbegen talapkerlerdiń máselesi qalaı sheshilgenin surady.
«Nelikten medısınalyq mamandyqtar boıynsha bólingen memlekettik tapsyrystyń medısınalyq joǵary oqý oryndarynyń arasyndaǵy bólinisi qujattar tapsyrý aıaqtalýyna bir kún qalǵanda jarııalanǵan? Grant bólý kezinde eki túrli buıryq shyǵaryp, qatelikter jibergen mınıstrlikterdiń jaýapty qyzmetkerleri qandaı jaýapkershilikke tartyldy?», – dep saýal joldady Á. Bekturǵanov.
Sonymen qatar, D.Espaeva, M.Qazbekova, A.Platonov, A.Perýashev sekildi halyq qalaýlylary da depýtattyq saýaldaryn qoıdy. Sondaı-aq, plenarlyq otyrysta Májilis depýtattary Albert Raý men Serik Sápıev saltanatty túrde ant berdi.
Abaı Asankeldiuly,
«Egemen Qazaqstan»
