Pavılon qyzmetkerleri daryndylar shoýy men sherýi syndy sharalar uıymdastyryp, EKSPO halyqaralyq qoǵamdastyǵy arasyndaǵy dostyqty nyǵaıtýǵa septesti. Kórmeni tamashalaǵan qonaqtar Shveısarııa týraly kóbirek málimet alýǵa tyrysty. Olardy ásirese kartop úıi qatty qyzyqtyrdy. Munda qýat únemdeý jolymen pisirilgen 31 878 tabaq reshtı (Shveısarııa taǵamy) usynyldy. Al balalarǵa Haıdı esimdi áıgili keıipkerimen jaqsy tanys «Oryndalatyn tapsyrma» beıneoıyny aıryqsha unady.
Pavılon komıssary Manýel Zalhlı EKSPO nátıjesine rıza ekendigin bylaı jetkizdi: «Biz qazaqstandyqtardyń jańa nárseni bilýge qushtarlyǵyna qaıran qaldyq. Olar Shveısarııadaǵy turaqty energııa kózderi qalaı paıdalanylatynyn uǵynýǵa tyrysty. Ári shveısarııalyqtardyń ekologııalyq qaýipsiz ortada ómir súrýge umtylýy da olardyń qyzyǵýshylyǵyn týǵyzdy».
Ekologııalyq taza tehnologııalar salasyndaǵy zertteýler men ınnovasııalardy shırek ǵasyr boıy qoldanyp kelgen Shveısarııa «Bolashaq energııasy» taqyrybyn odan ári damytýǵa súbeli úles qosty. Shveısarııanyń Qazaqstandaǵy elshisi Ýrs Shmıd Qazaqstannyń qarqynmen damyp kele jatqan memleket ekendigine toqtalyp, «Shveısarııa «jasyl» tehnologııany ázirleýge ári qoldanýǵa yntaly qazaqstandyq kompanııalarmen, mekemelermen, jeke tulǵalarmen jańǵyrmaly energııa kózderi salasyndaǵy tájirıbesimen qýana bólisedi», dedi.
Shveısarııanyń ulttyq kúni kezinde prezıdenti Dorıs Loıthard bir kúnin EKSPO kórmesinde ótkizdi. Ol merekelik is-sharany saltanatty túrde ashyp, Qazaqstannyń resmı tulǵalarymen jáne BAQ ókilderimen kezdesti. Sodan keıin D.Loıthard Qazaqstan Prezıdenti Nursultan Nazarbaevpen kezdesti. Elbasy eki el arasyndaǵy baılanysqa keńinen toqtalyp, taraptar arasyndaǵy ekonomıkalyq jáne saıası qatynastardyń odan ári damıtynyna senim bildirdi.
Pavılonda bolǵandardyń 86 paıyzy Shveısarııany tehnıkalyq turǵydan damyǵan jáne memlekettiń qýat kózderin únemmen paıdalanatyn el retinde tanıtyndaryn bildirdi. Sondaı-aq, pavılon «Exhibitor Magazine» baıqaýynda «Úzdik prezentasııa» sanaty boıynsha ekinshi oryn ıelendi. Budan basqa ǵylymı áriptestiktiń alǵashqy negizi qalanyp, yntymaqtastyq týraly memorandýmǵa qol qoıyldy, sý resýrstaryn basqarý jobasy bastaldy. EKSPO-2017 kórmesi aıaqtalǵannan keıin de eki el arasyndaǵy qarym-qatynas odan ári nyǵaıyp, óz jemisin beretini anyq.
Ashat Raıqul,
«Egemen Qazaqstan»
