Kendi Altaıdaǵy keleli ister

Muhtar Qul-Muhammed О́skemen qa­lasynda kezekte turǵan azamattar úshin salynyp jatqan turǵyn úıdiń qurylysymen tanysty jáne «Damý» qory arqyly qar­jy­landyrylǵan «Sılýmın-Vostok» kásip­ornynyń eńbek ujymymen kezdesti. Sondaı-aq, partııanyń oblystyq aktıvimen de kezdesip, Elbasy aıqyndap bergen basym baǵyttardy júzege asyrýdyń joldaryn talqylady.

Jalpy, О́skemen qalasyndaǵy 19-shaǵyn aýdanda 2021 jylǵa deıin 144 turǵyn úı salý josparlanyp otyr. Sonyń nátıjesinde jalpy aýdany 876 myń sharshy metrdi quraıtyn 14327 páter halyq ıgiligine berilmek. Oblys ortalyǵynda mundaı aýqymdaǵy qurylys jumystaryn júrgizýge Elbasynyń bastamasymen qolǵa alynǵan jańa memlekettik baǵdarlamanyń arqasynda múmkindik týyp otyr. Atalǵan turǵyn úılerge kommýnıkasııa júrgizý úshin tek «Nurly jol» baǵdarlamasy bo­ıynsha óńirge 9 mlrd teńgeden astam qarajat bólingen. Jańa páterlerdiń halyqtyń áleýmettik az qamtylǵan bóligine, bıýdjetti mekemelerdiń qyzmetkerlerine jáne memlekettik qyzmetkerler men áskerılerge beriletinin atap ótken jón.
Muhtar Qul-Muhammed Shyǵys Qa­zaq­stan oblysynyń ákimi Danıal Ahme­tovpen birge atalǵan úılerdiń qurylys jumystarymen arnaıy tanys­ty. Bo­lashaqta bul aýdanda О́skemen qalasynyń sol jaǵalaýdaǵy ortalyǵyn qurý kózdelip otyr. Qazirdiń ózinde munda turǵyn úı­ler­den bólek, oblystyq sot, prokýratýra, qan ortalyǵy, 1000 oryndyq orta mektep, balabaqsha jáne dzıýdo ortalyǵynyń ǵımarattary paıdalanýǵa berilgen. О́skemen qalalyq ákimdigi qurylys bóliminiń basshysy Baýyrjan Qudııarovtyń aıtýynsha, keleshekte bul aýdanda ákimdik ǵımaratyn, sport keshenin, kınoteatr, stýdentter qa­lashyǵyn, qazaq drama teatryn jáne qa­zirgi zamanǵy saýda ortalyǵyn salý jos­par­lanǵan.

Osy jumystardyń barlyǵy Memleket basshysynyń óńirge jasap otyrǵan erekshe qamqorlyǵynyń arqasy ekenin aıtqan Muhtar Qul-Muhammed: «Elbasynyń «Nurly jol», «Nurly jer» baǵdarlamalary boıynsha Shyǵys Qazaqstan oblysyna búginniń ózinde 150 mlrd teńgeden astam qarajat bólindi. Qazir biz turǵan jerde 144 turǵyn úı salynyp, myńdaǵan adam páterge ıe bolady. Mundaı keń kólemdegi turǵyn úı qurylysy О́skemende eshqashan bolǵan emes. Osynyń bári Elbasymyzdyń Shyǵys Qazaqstan halqyna jasaǵan erekshe qamqorlyǵynyń kórinisi. Budan artyq qandaı qamqorlyq bolýy múmkin?!» dedi.

Sońǵy jeti aıda Shyǵys Qazaqstan oblysynda óndirilgen ónerkásip ónimderiniń kólemi 845 mlrd teńgeden asty. Úshinshi jańǵyrý baǵdarlamasy aıasynda qarqyndy jumys istep turǵan kásiporyndardyń qa­tarynda «Sılýmın-Vostok» JShS-de bar. Bul jerde sorǵy qondyrǵylary, qu­byr jelisine arnalǵan armatýralar jáne kez-kelgen jumysqa qoldanýǵa bolatyn elektrotehnıkalyq buıymdar da­ıyn­dalady. Taıaýda atalǵan ónerkásip orny «Damý» qory arqyly 213,5 mln teńge kóle­minde tıimdi nesıe alǵan. Bul qarjy jańa qondyrǵylar satyp alýǵa jumsaldy. Memleket tarapynan jasalǵan osyndaı qoldaýdyń arqasynda shyǵysqazaqstandyq kásipkerler Ortalyq Azııa men Reseı naryǵyna shyǵýǵa múmkindik alyp otyr. Eń bastysy, О́skemende daıyndalǵan tehnologııalyq ónimderdiń sapasy sheteldik buıymdardan esh kem emes.

«Sılýmın-Vostok» zaýytynyń irgesi 1996 jyly qalanǵan. Alǵashynda munda bar bolǵany 11 adam jumys istese, bú­ginde kásiporyn 240 adamdy turaqty jumyspen qamtyp otyr. «Qazirgi tańda memleket qoldaýynyń arqasynda zaýyty­myz qarqyndy jumys istep tur. Túrli ınjenerlik jumystarmen aınalysatyn bizdiń zaýyt úshin mundaı qoldaýlar taptyrmaıtyn múmkindik. Sonyń arqasynda búginde jobalaý kezeńinen bastap kez-kelgen kúrdeli nysandardy salýǵa jáne ǵımarattardy avtomattandyrýǵa múmkindik aldyq», deıdi «Sılýmın-Vostok» JShS-niń damý jónindegi dırektory Zoıa No­vo­lodskaıa.

Muhtar Qul-Muhammed «Sılýmın-Vos­­tok» zaýyty prezıdenttik baǵdar­la­ma­lardyń jemisi ekenin aıtyp:
«Elbasymyz táýelsizdiktiń alǵashqy kúnderinen bastap elimizde shaǵyn jáne orta bıznestiń damýyna barlyq jaǵdaıdy jasap keledi. Jyl saıyn osy salaǵa respýblıkalyq bıýdjetten mıllıardtaǵan qarjy bólinýde. Búginde memleket-jeke­menshik áriptestigi arqasynda kásipkerler de ár túrli iri jobalarǵa óz ınvestısııala­ryn sala bastady. Sonyń nátıjesinde tek qana Shyǵys Qazaqstan oblysynda 40-tan astam jańa kásiporyndar ashylyp, onda túrli salalar boıynsha mamandanǵan 6 myńnan astam adam turaqty jumyspen qamtylǵan.

Bul kásiporyndardaǵy qondyrǵylar shaǵyn jáne orta bıznes el ekonomıkasynyń 60-70 paıyzyn quraıtyn Japonııa, Koreıa sııaqty eń damyǵan elderden ákelingen. Jumystyń barlyǵy 4G deńgeıindegi sýpertehnologııalar arqyly júrgiziledi. Eń bastysy, elimizde sol zamanaýı teh­nologııalardyń tilin erkin meńgergen bilikti mamandardyń sany artty. Búgingideı úshinshi jańǵyrtý jaǵdaıynda mundaı bastamalardyń el ekonomıkasyna tyń serpin bereri sózsiz.

Jalpy, Memleket basshysynyń shaǵyn jáne orta bızneske jasap otyrǵan erekshe qamqorlyǵy úsh birdeı ózekti máseleniń oń sheshilýine yqpalyn tıgizedi. Olar: bi­rin­shiden, óńirlerdiń ekonomıkasyn árta­raptandyrady. Ekinshiden, jańa kásip­oryndar men jumys oryndary ashylady. Úshinshiden, ishki jáne álemdik naryqta su­ra­nysqa ıe, joǵary básekege qabiletti, sapa­ly ónim óndiriledi», dedi.

Sonymen qatar, sapar barysynda Muh­tar Qul-Muhammed oblys ortaly­ǵyn­daǵy etnografııalyq keshende Shyǵys Qa­zaqstan oblysyndaǵy Qazaqstan halqy As­sambleıasynyń ókilderimen de kezdesti. Atalǵan keshende elimizde turatyn túrli etnos ókilderiniń 17 úı-jaıy ornalasqan. Kezdesýde negizinen Elbasymyzdyń «Bo­la­shaqqa baǵdar: rýhanı jańǵyrý» baǵdar­lamalyq maqalasyndaǵy tyń bastamalar jaıy sóz boldy.

Al «Nur Otan» partııasynyń ob­lys­tyq aktıvimen kezdesýde Muhtar Qul-Mu­ham­med Elbasy, partııa Tóraǵasy N.Á.Nazarbaevtyń barlyq bastamasyn ár shyǵysqazaqstandyqqa jetkizip, túsindirýdiń mańyzy zor ekenine erekshe nazar aýdardy. Soǵan oraı naqty tapsyrmalar berip, osy jolda partııanyń ár qyzmetkeri aıanbaı eńbek etýi kerektigin atap ótti.

Azamat QASYM,
«Egemen Qazaqstan»

Shyǵys Qazaqstan oblysy